Por E.P. | SANTIAGO DE COMPOSTELA | 24/07/2022 | Actualizada ás 17:41
Con motivo da celebración este luns do "Día da Matria Galega", Podemos Galicia emitiu un comunicado no que mostra a súa solidariedade coas persoas afectadas polos incendios forestais, á vez que insta a abrir un "debate urxente" nas administracións e a sociedade sobre o modelo ecolóxico e ambiental de Galicia.
"Estamos ante os lumes máis destrutores da historia de Galicia e non podemos esquecer que cada hectárea queimada é unha perda irreparable para o noso patrimonio, máis cando falamos de zonas dunha inmensa riqueza ambiental e paisaxística", destaca Podemos, para quen o futuro dos montes galegos é "tamén o futuro" de Galicia.
Por iso, instan a "deixar atrás o modelo que levou á destrución de hoxe e transitar cara a outro" que aposte polo "coidado e a protección da biodiversidade", así como por un "rural vivo". Para a formación, "toca escoitar as voces de quen reclama outro modelo forestal", ou que "a transición enerxética se realice a favor dos territorios e as xentes que os habitan e non de intereses alleos", xa que "o desenvolvemento, a industria e a innovación deben contribuír a soster e coidar o patrimonio natural e cultural de Galicia".
Desde Podemos consideran "imprescindible e urxente dar este debate" non só nas institucións, se non no seo da sociedade. "A Galicia que vén está nas mans do pobo, a sustentabilidade é o único camiño para preservar a esencia e a riqueza do que somos", sinalan.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.