Por Europa Press / Redacción | Santiago | 18/09/2022 | Actualizada ás 13:38
A conselleira de Infraestruturas e Mobilidade, Ethel Vázquez, asegurou este domingo que sospeita que o Goberno central coñece as causas do colapso do viaduto do Castro na A-6 e demandou unha "mesa de intercambio de información" entre a Xunta e o Executivo de Pedro Sánchez ante unha situación que cualificou de "preocupante".
Nunha entrevista concedida á Radio Galega recollida por Europa Press, a conselleira xustificou esta sospeita polas declaracións en prensa da secretaria de Estado de Infraestruturas, Isabel Pardo de Vera, nas que anunciaba, antes de dar a coñecer as causas do derrube, que a reapertura do viaduto paralelo ao que colapsou levaría a cabo durante o primeiro semestre de 2023.
"Lamentamos que os representantes do Goberno de España veñan a Galicia a falar de infraestruturas fundamentais e coñecer datos polos medios de comunicación cando desde o primeiro momento do colapso do viaduto estivemos pendentes, solicitando explicacións, medidas e fixemos propostas alternativas para que se realizasen canto antes desvíos directos", reprochou a conselleira.
Ademais, tachou de "solución parcial" o desvío da A-6 operativo desde este sábado que evita que os vehículos que circulan en dirección Madrid atravesen Pedrafita do Cebreiro. Para a titular de Infraestruturas, non se trata dunha solución total porque "só evita o tráfico por Pedrafita en dirección Madrid, pero en dirección A Coruña séguese pasando por esa travesía incómoda para todos os usuarios que circulan cara a Galicia".
Así mesmo, denunciou "falta de respecto institucional" por parte do Goberno de Pedro Sánchez, xa que considera que "desde o punto de vista de obra pública", o Executivo central "no canto de tender pontes coas administracións, rómpeos".
BONOS TREN: "INCAPACIDADE DE XESTIÓN"
Por outra banda, Ethel Vázquez criticou a "manifesta incapacidade de xestión" do Executivo central á hora de implantar os bonos gratuítos de tren no Eixo Atlántico e puxo como exemplo os problemas por falta de prazas que se rexistraron nas primeiras semanas desde a súa activación.
Nesta mesma liña, afirmou que ve "fóra de lugar" e "pouco respectuoso" que o delegado do Goberno, José Miñones, "bote a culpa aos cidadáns" dun sistema de xestión que depende "exclusivamente do Goberno". Así, solicitou máis prazas e frecuencias: "As que sexan necesarias para cubrir a demanda".
"Creo que é unha mostra da incapacidade de xestión por parte do Goberno de España porque estamos a falar dunha situación completamente esperable se dás un servizo gratuíto. Todos o vimos vir", insistiu.
Cuestionada sobre se se debería alongar a medida máis aló de decembro, Ethel Vázquez argumentou que se debe "planificar e xestionar mellor calquera medida" para fomentar o transporte público. Para iso, reiterou, "hai que dotalo de prazas suficientes e investir en infraestruturas necesarias para asegurar a súa calidade".
A SECA, "PREOCUPANTE"
En relación coa situación da seca en Galicia, a conselleira explicou que desde febreiro advertiron aos concellos de que a situación era "preocupante e grave" nun contexto de seca "a nivel europeo". Por iso, insistiu na súa mensaxe de aforrar auga ante a prealerta de seca que se rexistra na comunidade.
"Estamos nunha situación grave e non podemos levarnos a engano que con catro días de choiva arranxamos un ano extremadamente seco. A situación segue sendo preocupante e temos que adoptar todas as medidas de contención do consumo de auga", reiterou.
Neste sentido, sinalou os baixos niveis de auga en ríos como o Lérez, o Anllóns, o Grande ou o Tambre, así como na demarcación da conca hidrográfica Miño-Sil. Alí, demandou medidas de contención do consumo porque a situación é "preocupante".
Sobre posibles cortes no consumo, Vázquez volveu a pedir responsabilidade para evitalos e manifestou que, segundo os datos de Meteogalicia, a segunda quincena de setembro e o mes de outubro serán secos, polo que instou á poboación a tomar conciencia porque "si que pode estar comprometida nalgunha zona máis vulnerable o abastecemento da poboación".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.