Sabes cal é a cidade galega onde se pagan máis impostos... e a que menos?

Rede Localis pide unha maior cooperación entre administracións para "actualizar urxentemente" os valores catastrais.

Por Europa Press / Redacción | VIGO | 28/11/2022 | Actualizada ás 12:45

Comparte esta noticia

A Rede Localis, Rede de Administración Local, solicitou este luns unha maior cooperación entre administracións co fin de poder actualizar de forma urxente os valores catastrais e, evitar deste xeito, o "raquitismo fiscal".

Así o fixo constar mediante a presentación de nota número 20 do Observatorio Municipal Galego, informe que foi elaborado polo profesor do Grupo XENE de investigación da Universidade de Vigo (UVigo) e codirector de Rede Localis, Alberto Vaqueiro García.

As tres figuras impositivas obrigatorias analizadas neste estudo foron o Imposto sobre Bens Inmobles (IBI), o Imposto sobre Actividades Económicas (IAE) e o Imposto sobre Vehículos de Tracción Mecánica (IVTM).

A pesar de que todos eles están condicionados polas directrices estatais, o estudo revela que, no caso do IBI, existen grandes diferenzas entre Galicia e a media nacional. Un feito que Rede Localis considera que pode deberse a un "certo raquitismo fiscal recadatorio nalgúns concellos galegos e o elevado peso de concellos de menor tamaño poboacional en Galicia, que como se comprobou adoitan aplicar tipos impositivos menores".

Segundo Rede Localis, o 45% dos Concellos en España non revisou o valor catastral dos inmobles desde hai máis de 20 anos. En Galicia esta porcentaxe ascende ao 53%. Por este motivo, considera necesario "realizar urxentemente unha revisión dos valores dos inmobles para mellorar a capacidade fiscal do IBI".

Varias persoas camiñan polo centro de Ribadeo
Varias persoas camiñan polo centro de Ribadeo | Fonte: Carlos Castro - Europa Press

Así mesmo, Rede Localis recomendou un maior grao de actualización do catastro que "permitiría detectar posibles bolsas de fraude e melloraría a capacidade tributaria propia da administración local galega" así como unha maior participación dos gobernos locais con relación á actualización dos valores catastrais.

RESULTADOS DO ESTUDO

O informe presentado por Rede Localis chegou á conclusión de que os residentes de Santiago de Compostela son os que soportan un IBI maior, con 356 euros por habitante. Pola súa banda, a menor recadación por habitante recóllea o Concello de Pontevedra, con 219 euros por habitante.

Vigo, con 13,5 millóns de euros, e A Coruña, con 10,8 millóns, son os dous concellos que máis recadan polo IAE, seguido polo de Lugo, con 4,4 millóns de euros. Ademais, o Concello de Ourense, o terceiro por poboación de Galicia, é o que menos recada das sete cidades con máis habitantes, un resultado que Rede Localis atribúe á menor actividade económica e a reducida carga de tipos que aplica o consistorio ourensán.

En cuato ao IVTM, os concellos de Vigo, con 14,9 millóns de euros, e A Coruña, con 11,1 millóns de euros, son os dous consistorios que máis recadan. En termos por habitante, o concello de Ourense sería o último xunto coa Coruña que menos recada, con 45,4 euros por habitante, mentres que a que máis ingresa por este concepto é Lugo, con 59,9 euros por habitante.

Os habitantes de Santiago de Compostela pagan máis ou menos neste tres impostos obrigatorios case 433 euros, sendo os que máis ingresan a nivel municipal, mentres que os de Pontevedra pagan 298,6 euros, sendo a media das sete cidades galegas de 346,5 euros.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta