O vento causa dous accidentes, afortunadamente, sen vítimas

O Centro Integrado de Atención ás Emerxencias 112 Galicia informou este mediodía de dous accidentes sen feridos por fortes refachos de vento que están a azoutar as provincias galegas.

O primeiro deles, pasadas o oito da mañá, na N-634 á altura de Barreiros (Lugo), cando un particular informaba de que acababa de chocar contra unha árbore que obstaculizaba a estrada.

Unhas horas despois, ás 12,30 horas, unha árbore caía sobre un vehículo que circulaba polo quilómetro tres da AC-110, ao seu paso por Moeche (A Coruña). Ambas as áreas atópanse en alerta, no caso da Coruña amarela e por outra banda Lugo en laranxa.

EMERXENCIAS

Nesta líne, nas últimas horas o servizo de emerxencias rexistrou ata 145 incidencias pola acción do vento, as máis frecuentes relacionadas con árbores e ramas nas calzadas, con 76 casos, seguidas da prevención de riscos, con 29.

Con relación a estas últimas, notificaron a presenza de obxectos, como postes de tendido eléctrico, tellas ou carteis que estaban a piques de precipitarse. Ademais, destacan ata 16 caídas de cables eléctricos en vías de circulación.

Así mesmo, A Coruña é a provincia que reuniu máis incidencias ao longo da mañá, con case un centenar, seguida por Pontevedra con 29, Lugo, que suma 18 e por último Ourense con catro.

ALERTAS

A Dirección Xeral de Emerxencias e Interior da Vicepresidencia Segunda dA Xunta activou a alerta laranxa por choiva no centro e sur da provincia de Lugo; no sur, noroeste e Miño de Ourense; e en toda a provincia de Pontevedra.

As provincias da Coruña e de Pontevedra están xa desde o mediodía en aviso amarelo, e as de Lugo e Ourense estarano a partir de media tarde, con precipitacións acumuladas que poden alcanzar os 50 mm en 12 horas e os 15 mm nunha hora.

En canto ao vento, un fenómeno meteorolóxico adverso de nivel laranxa afecta á Mariña de Lugo e ao oeste da Coruña, con refachos de ata 100 km/h. No resto da provincia da Coruña e na de Pontevedra, así como na montaña e no centro de Lugo, hai nivel amarelo con refachos que poderán alcanzar o 90 km/h.

SERVIZO DE EMERXENCIAS

Galicia conta con case 70 servizos profesionais, 234 agrupacións de Protección Civil e diferentes reténs de garda, ademais dos corpos e forzas de seguridade, para xestionar as emerxencias durante todo o ano. En caso de festivos como o de Noiteboa, día no ocorreu o accidente de bus de Cerdedo-Cotobade, así como en xornadas con alertas meteorolóxicas, refórzanse servizos como o do 061, tal e como ocorre este Fin de Ano.

"Afortunadamente, hoxe en Galicia estamos moitísimo mellor que hai uns anos: temos moitos servizos de emerxencia, bombeiros, grupos de emerxencias supramunicipais, agrupacións de Protección Civil e todos os corpos de seguridade que nun tempo razoable prestan unha atención a quen require unha axuda", asegura o director xeral de Emerxencias e Interior, Santiago Villanueva, nunha entrevista con Europa Press.