O proxecto para producir metanol verde en Caldas xerará preto de 3.000 toneladas anuais
O Goberno central subliña o seu compromiso co proxecto de Foresa e Iberdrola.
Por Europa Press / Redacción | PONTEVEDRA | 12/01/2023 | Actualizada ás 17:12
O Goberno central subliña o seu compromiso co proxecto de Foresa e Iberdrola para producir preto de 3.000 toneladas anuais de metanol verde no municipio pontevedrés de Caldas de Reis tras conceder unha axuda por 5,2 millóns de euros.
Así o destacou o delegado do Goberno, José Miñones, con motivo dunha visita á planta química de Foresa este xoves. O proxecto Green Umia-H2 Galicia ten previsto un investimento global de 40 millóns de euros para a creación dunha nova planta de hidróxeno verde que permitirá reducir 58.000 toneladas de dióxido de carbono durante os seus dez primeiros anos de vida.
"Este proxecto representa o camiño cara á transformación do noso modelo produtivo", resalta o delegado do Goberno. A iniciativa sitúase como referente internacional ao obter a máxima puntuación entre todos os proxectos en concorrencia competitiva na convocatoria de axudas do Ministerio de Transición.
Así mesmo, lembra que o Perte de Enerxías Renovables deixa 32 millóns de euros en Galicia para tres proxectos de hidróxeno verde estratéxicos: Caldas, As Pontes e porto de Vigo.
Na súa visita á planta de Caldas, Miñones estivo acompañado polo alcalde, Juan Manuel Rey; membros da dirección de Foresa, Begoña Gómez e Jesús Gómez; a directora da planta en Caldas, Beatriz Lagares; e o delegado institucional de Iberdrola, Francisco Silva, entre outros.
