A Xunta di que o 60% dos abortos practícanse en centros públicos e o resto son derivados á privada
Asegura que a reforma da lei do aborto non implicará para Galicia "case ningún cambio".
Por Europa Press / Redacción | SANTIAGO DE COMPOSTELA | 08/02/2023 | Actualizada ás 18:28
O conselleiro de Sanidade, Julio García Comesaña, asegurou que en Galicia se practican abortos en centros públicos das sete áreas sanitarias e afirmou ademais que a reforma da lei do aborto non implicará para Galicia "case ningún cambio".
Na súa resposta á interpelación exposta pola deputada socialista Noa Díaz sobre os dereitos reprodutivos das mulleres, Comesaña aseverou que "sexa cal for a opinión sobre a lei, a posición é a de cumprila". A única acción que traerá a nova reforma, explicou, será a creación dun rexistro de obxectores, medida contra a que presentaron alegacións. "A nosa experiencia di que non é necesario un rexistro para garantir a prestación. Temos experiencia coa Lei da Eutanasia", apuntou.
Sinalou ademais que a lei abre a porta a derivar ás pacientes que desexen interromper o seu embarazo a outra comunidade autónoma, o máis preto posible, se non se pode realizar a intervención na propia, "algo que para Galicia é indiferente".
Así, explicou que por baixo do nove semanas, os centros do sete áreas levan a cabo abortos farmacolóxicos. Entre os nove e as 14 semanas, con procedemento instrumental; entre 15 e 22 semanas, que a lexislación vixente só o permite por causas médicas, practícase tanto o farmacolóxico como o instrumental nos hospitais de cabeceira e nalgún comarcal.
Máis aló das 22 semanas, que se realizan pola saúde do feto, argumenta o conselleiro que en Galicia se garante a atención no sistema público e que se practican este tipo de intervencións, de alto risco, no Álvaro Cunqueiro desde 2017 e no de Ourense desed 2019.
O conselleiro ofreceu tamén datos respecto das intervencións realizadas en 2022. Segundo indicou, da totalidade das solicitadas, máis do 60% practicáronse en centros públicos. Ademais, puntualizou que o Sergas deriva a dous centros privados con autorización autonómica, "co custo asumido sempre polo sistema público".
ENTIDADES ANTIABORTISTAS
A portavoz de Igualdade do Grupo Socialista afirmaba que hai áreas sanitarias en Galicia "nas que non se practican abortos na pública en función da semana de xestación, derivando a centros privados". Sobre isto, instaba o Goberno galego a cumprir "con dilixencia" a reforma da lei, que determina que a rede pública será "de referencia" para que as mulleres que decidan abortar "poidan facelo no centro público hospitalario máis próximo ao seu domicilio".
Díaz xustificou as súas dúbidas polo "titubeo" e as "posturas nada contundentes" de apoio aos dereitos das mulleres por parte do PP durante a polémica polo anuncio do Goberno de Castela e León dun protocolo que tachou de "infame" para "coartar o dereito das mulleres a interromper o seu embarazo".
Por último, Díaz preguntou polas "entidades antiabortistas instaladas en Galicia coa subvención da Xunta" e que co novo texto quedarán excluídas das axudas públicas. "Estas son actualmente as que máis subvencións reciben nas axudas para traballar con mulleres en contextos de vulnerabilidade", advertiu.
