Oferta de emprego no SERGAS para máis de 400 postos de difícil cobertura sen oposición
O presidente galego, Alfonso Rueda, sinalou que esta oferta entra "dentro do que poden facer as comunidades autónomas", ao referirse de novo ao "déficit" de profesionais en determinadas especialidades.
Por Europa Press / Redacción | SANTIAGO DE COMPOSTELA | 23/03/2023 | Actualizada ás 14:51
O Consello da Xunta aprobou este xoves a nova oferta de emprego público para 421 postos de difícil cobertura na sanidade galega sen oposición.
En concreto, serán 116 para hospitais comarcais, 72 de familia en centros de saúde, 60 pediatras en centros de atención primaria e 173 para a área de saúde mental.
Esta medida, segundo destacou o presidente galego, Alfonso Rueda, entra "dentro do que poden facer as comunidades autónomas", ao referirse de novo ao "déficit" de profesionais en determinadas especialidades.
E é que, para impulsar a súa cobertura, estas prazas ofértanse "por concurso de méritos sen necesidade de exame". "Somos pioneiros", reivindicou Rueda, para quen as 106 ofrecidas o ano pasado a través desta modalidade "acreditaron a súa eficacia". Por iso, a Xunta "quere seguir neste camiño", incidiu.
