Greenpeace considera "insuficiente", "simplista" e "baleira de contido" a futura lei galega de clima
Critica que non cumpre coas expectativas, pois debería perseguir o obxectivo primario de alcanzar o cero neto en emisións en 2040 como tarde.
Por Europa Press / Redacción | SANTIAGO DE COMPOSTELA | 27/07/2023 | Actualizada ás 19:09
Greenpeace considera "insuficiente" o anteproxecto de lei do clima de Galicia para afrontar a emerxencia climática.
Nun comunicado, a organización ecoloxista informa de que presentou alegacións ao anteproxecto porque o texto "é excesivamente simplista e baleiro de contido".
Así, bota en falta "establecer obxectivos concretos, vinculantes e con rango de lei" para a redución de gases de efecto invernadoiro en todos os sectores e en etapas intermedias, non só para 2050.
Critica que a futura lei non cumpre coas expectativas, pois debería perseguir o obxectivo primario de alcanzar o cero neto en emisións "non en 2050, senón como tarde en 2040, algo máis acorde coa ciencia".
Por tal motivo, reclama que se estableza unha folla de ruta "clara, cuantificable e calendarizada" de abandono dos combustibles fósiles, tanto no caso do petróleo como do gas fósil e do carbón.
