Anímaste a visitar Tenerife no Nadal? O aeroporto de Santiago incrementa os voos

As illas Canarias son un paraíso durante calquera época do ano, pero especialmente durante o inverno, pois resulta moi difícil atopar en España un destino onde faga calor e non haxa que sucumbir ás baixas temperaturas propias desa época do ano. Cunha temperatura media entre os 18 e os 21 graos, Tenerife constitúese así como unha das eleccións que cada ano miles de galegos fan para pasar as súas vacacións de Nadal. 

Tanto é así que Air Nostrum, a aerolínea franquiciada de Iberia para voos rexionais, acaba de pór á venda os voos especiais para o Nadal que sairán do aeroporto de Santiago. Entre eles, os voos coas Illas Canarias teñen unha cobertura moi especial: desde Santiago vaise a voar a Tenerife en sete días, o que representa un 40 % máis de prazas que en 2022. As xornadas da operativa son 21, 23, 26, 28 e 30 de decembro e 2 e 6 de xaneiro.

E que é o que podes facer en Tenerife durante o Nadal? As opcións son moi variadas e diversas, para todos os gustos. Por un lado, está o coñecido como Bautizo de Ano Novo, que consiste en sumerxirse no mar para deixar atrás todo o malo e entrar no novo ano limpo. Relacionado co mesmo, celébrase a travesía a nado de Ano Novo pola illa. Cada 1 de xaneiro ao longo do porto sur de Santa Cruz máis de 200 nadadores elixen entre un percorrido de 1.000 ou 2.000 metros. 

Por outra banda, para os amantes das tradicións de Nadal, hai decenas de beléns artesanais repartidos por toda a illa. Usando unha bici (que se pode alquilar) pódense coñecer case todas estas xoias, que non teñen desperdicio. Comézase a ruta polos emblemáticos beléns de Santa Cruz de Tenerife, pasando pola Orotava e rematando no municipio da Laguna. Na primeira parada hai unha obra coa firma do artesán Jesús Gil: o belén xigante de Santa Cruz, que se instala ás portas do Concello, co nacemento de Xesús representado ao longo de 12 metros cadrados a dúas alturas, con figuras situadas ao lado dunha árbore que supera os 4 metros; na Laguna hai sete portais; e na Orotova está o récord de beléns de Tenerife, con 30.

Así mesmo, para ninguén é un segredo que comprar en Tenerife sempre sae máis á conta, porque ao ter estatuto de rexión ultraperiférica dentro da Unión Europea, o imposto que se grava en Tenerife é do 7 %, o que permite aos comerciantes ofertar roupa, cerámica, artesanía local, produtos de marca e outras curiosidades dispoñibles nos mercadillos a mellores prezos. Entre estes mercados destaca o famoso mercado de La Recova, onde se pode encontrar todo tipo de gastronomía. Pero se se prefiren os grandes almacéns, pódese pasear polo clásico Centro Comercial de Praza do Duque, que ten unha área de compras ao aire libre; ou polo centro comercial Siam Mall, en Adeje.

Dentro dos plans para toda a familia, en Nadal o Concello de Santa Cruz de Tenerife promove a carreira dos Santas, un evento para disfrutar toda a familia. Contemplar esta peculiar proba atlética non pode faltar entre os plans, sobre todo se se vai ás illas con nenos. Os participantes poden elixir entre percorridos de dous ou cinco quilómetros pasando pola Praza España, a Avenida Marítima e o edificio do Cabildo. Os fondos recaudados adícanse a potenciar proxectos deportivos.

Outra opción é a de pasear en camelo, algo que en territorio español só se pode facer nas Illas Canarias. Ao igual que, segundo conta a lenda, chegaron os Reis Meigos ás portas do Portal de Belén, en camelo, podes desfrutar por un custe asequible dalgunha das rutas en camelo que ofertan a visión de paisaxes únicas. E iso escoitando de fondo algunha das numerosas panxoliñas que soan en distintos puntos da illa. 

E por se eres deses que prefiren encher o bandullo, Tenerife tampouco che defraudará, pois en decembro as comidas canarias transfórmanse en auténticos banquetes. Sancocho de peixe, troitas de Nadal, tarta da avoa, roupa vella, troitas de batata... E moitas máis especialidades caseiras. Segue a ruta dos Guachinches, eses establecementos de comida típica da illa onde serven pratos con racións xenerosas de comida caseira e viño de colleita propia, para desfrutar sen comparación. No concello da Orotava emprázanse a maioría deles.

Ademais, como non, ver o alumeado de Nadal é imprescindible. O casco histórico de San Cristóbal da Laguna énchese dunha maxia especial en Nadal. A Laguna é a segunda cidade máis poboada de Tenerife e foi declarada Patrimonio da Humanidade pola Unesco en 1999. Destaca polas súas igrexas, conventos e edificios históricos como a Santa Igrexa Catedral da Laguna. O alumeado de Nadal acéndese a finais de novembro, e destaca a rúa Ferradores. En total, máis de 2,2 millóns de bombillas LED distribúense polos cinco distritos da cidade.

Finalmente, aínda que sexa de lonxe, paga a pena ver o Teide tinguido de branco, cuberto por unha capa de neve que se mantén dende decembro ata febrero ou marzo. A súa paisaxe resulta espectacular tanto se se vai polo norte da illa como se se vai polo sur. O seu nevado, como pode suporse pola alta temperatura, non é abundante, pero si que hai pequenas capas que serven para unha boa foto. A 3.715 de altura sobre o nivel do mar, non hai que esquecerse de que o Teide é un volcán que representa o punto máis alto de España, formando parte dunha montaña que se extende ao longo de 19.000 hectáreas.