Por Europa Press / Redacción | SANTIAGO DE COMPOSTELA | 19/10/2023 | Actualizada ás 11:48
Os bombeiros de Santiago volveron a intervir en dúas ocasións durante a mañá deste xoves debido á inundación da rontonda de Fontes do Sar coa rúa de O Vieiro.
Segundo confirmaron a Europa Press, os feitos ocorreron ás 7,30 horas e ás 10,00 horas. O motivo foi o alagamento das arquetas que tiveron que ser desatascadas.
Con todo, a mañá deste xoves discorre "con tranquilidade", segundo apuntou o 112 a Europa Press, respecto da xornada da tarde do mércores onde as choivas deixaron numerosas incidencias.
Desta forma, o tren de borrascas, coa chegada de 'Aline', elevou a unhas 271 as inundacións e outras incidencias rexistradas polo 112 Galicia na comunidade entre o mediodía da pasada xornada e as 6,00 horas deste xoves.
DISPOSITIVO
Santiago mantén activo o dispositivo para xestionar as incidencias motivadas polas choivas intensas e, a modo preventivo durante a xornada deste xoves, pecha parques, paseos fluviais e polideportivos.
Así o anunciou en rolda de prensa a portavoz do goberno municipal, Míriam Louzao, que puntualizou que a causa das inundacións do mércores "non foi pola acumulación de follas nos sumidoiros".
Desta forma, detallou que a alcaldesa da capital galega, Goretti Sanmartín, convocou na mañá deste xoves unha reunión con membros do equipo de goberno, responsables de departamentos municipais e a Policía Local, para analizar e coordinar a situación producida polas intensas precipitacións.
A continuación, Louzao lembrou que desde o un de outubro Viaqua e Urbaser realizaron traballos para a retirada de follas de árbores e limpeza de sumidoiros que "estaban limpos" e esa "non foi a causa" das inundacións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.