"Que nos chame a TVG ou montar algo propio, o que pase primeiro"

Como naceu a idea de montar Páramo Pictures e comezar a filmar parodias en galego de vídeos musicais?

De momento Páramo Pictures é soamente un nome para que nos recoñezan. O nome ven de que a miña muller, un dos fundadores, é do Páramo e alí gravamos o primeiro vídeo "Vou Estalar". A idea naceu un día tomando un café co noso amigo Daniel Moreiras, cantante da orquestra Costa Dorada que daquela estaba na orquestra Noche de Gala, Tiña que cantar o hit do momento que era o Gamnan Style. Unha compañeira súa convenceuno para que fixera unha letra en galego. En canto nos ensinou a letra ocorréuseme facer un vídeo. Ó día seguinte gravamos a música e en un par de días, gracias a María a miña muller que se encargou do tema da produción e algúns familiares e amigos, saíu o noso primeiro éxito.

A Bertolina leva 1,6 millóns de visualizacións no Youtube, o Fertimón anda polas 714.000. Esperábanse tal éxito? Que factores cre que explican a súa enorme popularidade?

Se o souberamos faríamos un cada semana. Eses dous vídeos gustaron moito. Creo que ten moito que ver a canción orixinal, se non gusta a música a xente non a vai compartir e non a van a pinchar nos pubs. Por iso sempre tratamos de coidar, coas nosas limitacións, que a música sone o mellor posible. Despois é cuestión de pasalo ben facendo o vídeo, que é algo que o espectador nota tamén.

A súa canle no Youtube suma máis de 3,3 millóns de reproducións e 10.700 subscritores. Con tal volume de audiencia, reciben algún tipo de ingreso de Youtube? Barallaron algunha vez profesionalizar esta aventura audiovisual?

Algo imos sacando, o que pasa é que ó non ter os dereitos da música na maioría dos vídeos, non obtemos ingresos en todos eles. Danos para gastos de desprazamentos e comidas e pouco máis. O tema de profesionalizarnos, si que o temos pensado, pero de momento temos traballo  e non temos tempo. Andamos agardando a que nos chamen da TVG ou a quedarnos no paro e montar algo, o que pase primeiro.

Canto tempo invisten en cada un das parodias de vídeos musicais? E diñeiro? Tiveron que abonar dereitos de autor por facer as versións de temas tan populares?

O tempo soe ser de cinco días, un día para gravar o audio, dous para gravar o vídeo e outros dous de edición. Se non tiveramos outra cousa que facer, fariámolo en tres días sobradamente, pero así sería un traballo e perderíase a maxia. Iso si, nos vídeos musicais sempre collemos de algún sitio a base musical. Na úlitma parodia, a Pale Tilla, chamamos a uns DJs,  Sueiro & Chis,  para que nos fixeran a música porque se non levaríanos moitísimo máis tempo. Diñeiro investimos pouco. O que gastamos en desprazamentos e comida e bebida. Dereitos de autor non pagamos ningún. Non sabemos como está o tema legal a ese respecto, pero de momento o canal segue aberto.

Despois do éxito dos vídeos musicais, lanzaron unha web serie, Veciños, sobre as aventuras provocadas polo constraste entre un mozo galeguista e urbanita e Ramón, un paisano do rural. Como está a funcionar?

Ben, antes que nada hai que dicir que as personaxes da serie, aínda que doadamente recoñecibles, son esaxeradas ata o límite para crear a comedia. Ramón é un paisano de aldea egoísta, machista, hipócrita, tenas todas. E Berto, é un mozo galeguista ata o extremo, pacifista e un pouco pedante. Son dúas personaxes que igual non caerían ben se as coñeceramos por separado.

Cre que nas cidades de Galicia segue a mirarse as aldeas por riba do ombreiro, como se fosen algo atrasado?

Eu creo que o de mirar por riba do ombreiro por parte dos da cidade vai indo a menos pero nunca se vai erradicar por completo, porque de que nos íamos rir entón?

Ademais de en Veciños, en que anda a traballar Páramo Pictures? Que proxectos futuro? Algún vídeo paródico máis?

Non proxectamos nada. Quitando a parodia do video de Enrique Iglesias, que estivemos agardando meses con impaciencia, o resto das nosas producións planéase e execútase en unha semana ou nunha tarde, como o noso último vídeo no que nos presentabamos á alcaldía de Lugo. Igual nos presentamos ás Xerais  tamén, según nos dea.

En que quedou a súa colaboración co Land Rover de Roberto Villar na TVG?

A colaboración quedou no que se viu no programa e nada mais. Díxonos de ir a pasar un rato divertido e pasámolo como facemos sempre. Resultou interesante para nos participar nun proxecto profesional con dous dos mellores humoristas galegos. Tomamos moitos valiosos apuntes.