Investigadores da USC participan no novo informe global sobre a urxencia climática: "Non é posible seguir como ata agora"
"Agora que o quecemento global vai camiño de superar os 1,5 graos, é probable que se desencadeen cando menos cinco puntos de inflexión nos sistemas terrestres", advirte o informe, e pon como exemplo o colapso das grandes capas de xeo e a mortalidade masiva dos arrecifes de coral de augas cálidas, existindo tamén o risco dunha "perda catastrófica a escala mundial da capacidade de produción de cultivos básicos".
Por Europa Press / Redacción | SANTIAGO DE COMPOSTELA | 07/12/2023 | Actualizada ás 16:08
Máis de 200 investigadores e científicos, entre eles o profesor Sebastián Villadante e o investigador José Antonio Sanabria-Fernández, da USC, participan no 'Informe Mundial sobre os Puntos de Inflexión', un documento que afirma que a humanidade se atopa nunha "traxectoria desastrosa" que require "unha acción global de emerxencia" para conseguir un "futuro próspero e sustentable".
O informe, coordinado polo profesor Tim Lenton, da Universidade de Exeter (Reino Unido), e que se poderá baixar de https://global-tipping-points.org, preséntase como a avaliación máis completa xamais realizada sobre os puntos de inflexión do planeta. As súas conclusións déronse a coñecer este mércores na Conferencia das Nacións Unidas sobre o Cambio Climático de 2023 (COP28).
O documento foi elaborado por un equipo internacional en colaboración con Bezos Earth Fund, e nas súas páxinas afírmase que a actual gobernación mundial é inadecuada para a magnitude do reto que supón o cambio climático global, ante o que formula seis recomendacións crave "para cambiar de rumbo rapidamente, incluída a acción coordinada para desencadear puntos de inflexión positivos".
As seis recomendacións crave son: eliminar progresivamente os combustibles fósiles e as emisións derivadas do uso da terra, deténdoas moito antes de 2050; reforzar a adaptación e a gobernación de "perdas e danos", recoñecendo a desigualdade entre nacións e dentro delas; incluír os puntos de inflexión no Global Stocktake (o "inventario" climático mundial) e nos esforzos de cada país para facerlle fronte ao cambio climático; coordinar os esforzos políticos para desencadear puntos de inflexión positivos; convocar un cume mundial urxente sobre os puntos de inflexión e profundar no coñecemento dos puntos de inflexión.
Un punto de inflexión, segundo o informe, prodúcese cando un pequeno cambio desencadea unha transformación frecuentemente rápida e irreversible, e os seus efectos poden ser positivos ou negativos. Baseándose nunha avaliación de 26 puntos de inflexión negativos do sistema terrestre, o informe conclúe que xa non é posible "seguir como ata agora", pois xa se están producindo cambios rápidos na natureza e nas sociedades.
"Agora que o quecemento global vai camiño de superar os 1,5 graos, é probable que se desencadeen cando menos cinco puntos de inflexión nos sistemas terrestres", advirte o informe, e pon como exemplo o colapso das grandes capas de xeo e a mortalidade masiva dos arrecifes de coral de augas cálidas, existindo tamén o risco dunha "perda catastrófica a escala mundial da capacidade de produción de cultivos básicos".
