Plataformas próximas á ultradereita mobilizan a transportistas, gandeiros e agricultores

Plataformas de nova creación e moi próximas á ultradereita queren monopolizar o descontento no agro. Así, a Plataforma para a defensa do sector de transporte de mercadorías por estrada nacional e internacional, unha organización de empresas de transportistas, convocou un paro indefinido desde este sábado co que se suman ás protestas e a folga de agricultores e gandeiros promovidas pola Plataforma 6-F.

"Desde este momento queda convocado de maneira oficial un paro nacional indefinido", anunciou o líder da Plataforma de transportistas, Manuel Hernández, tras unha votación a man alzada na que participaron decenas de persoas que se concentraron no estadio Metropolitano, en Madrid.

Así referendou a Plataforma de transportistas a súa previsión de realizar paros desde este sábado de forma conxunta coa Plataforma 6-F de agricultores e gandeiros, cuxa portavoz, Lola Guzmán, estreitou a man a Hernández durante o anuncio. Ambas as dúas plataformas son de creación recente e moi vinculadas a Vox.

A Plataforma de transportistas é unha pequena patronal que paralizou unha boa parte da actividade económica en marzo de 2022 en todo o estado cun paro no sector e aproveitou as tensións no sector da agricultura, que se iniciaron hai dúas semanas en Francia e propagáronse ao resto de Europa, para sumarse a estas protestas. En novembro de 2022, esta asociación ameazou coa convocatoria doutro paro patronal para repetir o éxito cultivado uns meses antes, pero nesa ocasión non logrou transcender e en apenas uns días tívoa que suspender.

Un tractor de agricultor chega a Ourense durante unha manifestación e tractorada | Fonte: Rosa Veiga - Europa Press