27 viños da D.O. Valdeorras presentes en Alemaña na 'Prowein 2024'
A cidade alemá de Düsseldorf é a nova parada promocional dos viños de Valdeorras, que do 10 ao 12 de marzo poden degustarse nunha das máis prestixiosas feiras europeas do sector.
Por Galicia Confidencial | Vilamartín de Valdeorras | 13/03/2024 | Actualizada ás 09:00
Un ano máis, o Consello Regulador da D.O. Valdeorras volve participar na pestixiosa feira internacional Prowein dando a coñecer ata 27 referencias diferentes da comarca, 19 brancas e oito tintas.
Prowein é un dos salóns europeos con máis arraigo no continente para a promoción de viños de diferentes territorios amparados. A pasada edición desta feira, celebrada no ano 2023, contou con máis de 49.000 visitantes e a organización prevé aumentar a cifra neste ano. Cóntase que participen máis de 6.000 expositores e Valdeorras terá presenza no túnel do viño.
O Consello Regulador da D.O. Valdeorras participa nesta feira da man da Axencia Galega da Calidade Alimentaria (AGACAL), xunto a outras denominacións de orixe vitivinícolas galegas e “baixo o formato dun túnel do viño”, tal e como indica o presidente do organismo, José Ramón Rodríguez Castellanos.
“Tras a nosa participación en Vinexpo, na capital de Francia, achegámonos un ano máis ata Alemaña, parada obrigatoria para todo o sector do viño europeo. A nosa intención de promocionar os brancos e tintos da comarca, máis alá das nosas fronteiras, é un dos obxectivos prioritarios para o Consello Regulador que, neste 2024, ten planificada unha intensa axenda de difusión en distintos foros nacionais e internacionais”, conclúe Rodríguez Castellanos.
