O 061 asistiu a 41 persoas por 37 accidentes de tráfico durante a fin de semana
A proporción de homes atendidos foi do 68%, mentres que no caso das mulleres, do 32%.
Por Europa Press / Redacción | SANTIAGO DE COMPOSTELA | 25/03/2024 | Actualizada ás 11:52
Urxencias Sanitarias de Galicia-061 asistiu durante esta fin de semana a 41 persoas por 37 accidentes de tráfico ocorridos nas estradas galegas. Segundo explican nun comunicado, o período contabilizado comprende desde as 15,00 horas do venres 22 de marzo ata as as 23,59 do domingo 24.
Destacan que tanto o sábado como o domingo foron os días que rexistraron máis sinistros, con 15 accidentes de tráfico cada un. Así, a central de Coordinación do 061, recibiu 45 chamadas en relación cos accidentes de tráfico. Estas alertas xeraron 37 asistencias sanitarias por parte do persoal do 061, que atendeu a un total de 41 persoas. A proporción de homes e mulleres atendidos foi do 68% e do 32% respectivamente.
Por idades, o 30% dos atendidos tiña entre 20 e 34 anos. Por provincias, Pontevedra foi a que máis sinistros rexistrou con 16 accidentes de tráfico durante os desprazamentos destas datas, seguida da Coruña (12), Ourense (6) e Lugo (3). Os recursos sanitarios mobilizados polos médicos que atenderon as chamadas na Central de Coordinación do 061 foron 40.
As ambulancias asistenciais de soporte vital avanzado asistiron en tres accidentes, o helicóptero medicalizado mobilizouse en dúas ocasións, as ambulancias asistenciais de soporte vital básico asistiron en 33 sinistros e os equipos sanitarios de Atención Primaria que completan a dotación das ambulancias asistenciais de soporte vital básico do 061 prestaron asistencia sanitaria en dous accidentes.
En 35 casos os feridos foron trasladados aos centros sanitarios correspondentes e en seis ocasións se atenderon no propio lugar do incidente.
