Así competirá a Ribeira Sacra por ser Patrimonio Mundial en 2026

O Consello do Patrimonio Histórico Español decidiu por unanimidade que a candidatura da Ribeira Sacra sexa a proposta de España para inscribirse na Lista de Patrimonio Mundial de cara á súa presentación ante a Unesco na súa asemblea de 2026. En declaracións tras a reunión celebrada na illa da Palma que tomou esta decisión, o conselleiro de Cultura en funcións, Román Rodríguez, dixo estar "moi contento" e sentir un "gran orgullo" por esta candidatura que "vai ser un antes e un despois para este fantástico territorio do interior de Galicia". Agradece a "gran ilusión con que toda a poboación da Ribeira Sacra acolleu e acolle esta iniciativa".

Despois da retirada da candidatura en 2021 tras un informe desfavorable de Incomos, órgano asesor da Unesco, o Goberno galego redeseñou o proxecto para reenfocar na auga a proposta desta zona situada ao sur da provincia de Lugo e ao norte de Ourense. Abarca 22 municipios e 16.000 hectáreas. E é que Román Rodríguez remarca que en 2021 "houbo que facer unha parada", no que cualifica de "renuncia estratéxica para seguir avanzando no proxecto" e agora facer un "cambio de paradigma" para si competir por entrar en "un dos clubs máis selectos do mundo". Deste xeito, a Ribeira Sacra buscará entrar na lista de Patrimonio Mundial na que xa está o Camiño de Santiago, o centro histórico compostelán, a Muralla de Lugo ou a Torre de Hércules.

DINAMIZACIÓN

Así mesmo, o responsable da Consellería de Cultura considera que esta candidatura suporá un revulsivo para a "dinamización" dun territorio que sofre "problemas de despoboamento" e debilidades económicas. "En Galicia nunca deixamos de crer nas posibilidades da Ribeira Sacra e esta é, sen dúbida, unha moi boa noticia para todos, porque pór en valor e protexer este territorio é algo que asumimos como un gran reto de país", valora o conselleiro. E é que incide no agradecemento ao equipo técnico da candidatura e á "implicación moi forte por parte de poboación local" para alcanzar este paso "básico", aínda que "non é definitivo" para a declaración.

PASOS A SEGUIR

Tras este primeiro paso, a candidatura da Ribeira Sacra pasará a ser a proposta de España para a súa remisión á Unesco e a posterior avaliación no Comité do Patrimonio Mundial coa vista no 2026. Ao longo deste ano, o equipo técnico redactor, en colaboración co Ministerio de Cultura, deberán completar o expediente desde o punto de vista formal co fin de cumprir coas directrices operativas da Unesco. Posteriormente, o informe será presentado no Centro de Patrimonio Mundial da Unesco, localizado en París, en febreiro de 2025 para a súa avaliación polos órganos consultivos.

"UN GRAN DÍA PARA GALICIA"

O presidente da Xunta, Alfonso Rueda, valorou como "un gran día para Galicia" que o Consello do Patrimonio Histórico Español decidise que a candidatura da Ribeira Sacra fora a proposta de España para inscribirse na Lista de Patrimonio Mundial de face á súa presentación ante a Unesco na súa asemblea de 2026. "Nunca deixamos de crer na Ribeira Sacra", afirmou na súa conta da rede social X (antes Twitter), á vez que sinala que agora se afrontará a "recta final" desta candidatura. "Seguimos traballando coa vista na Unesco en 2026. Grazas a todos!", conclúe Rueda.

Pola súa banda, o presidente da Deputación de Ourense, Luís Menor, aplaudiu que "a Ribeira Sacra ten todos os requisitos para ser Patrimonio da Humanidade e Ourense necesita destas oportunidades". Nun comunicado, Menor aplaude esta decisión e móstrase confiado en que "agora si que vai chegar esta declaración" polo "traballo ben feito polos responables desta candidatura". Incide en que "sería magnífico" contar con esta distinción.