Feijóo dirixe a política sanitaria das autonomías do PP e anuncia vacinación contra o virus respiratorio sincitial
Di que coa súa visita a un centro de maiores quere demostrar que hai "outra forma de gobernar" e unha "alternativa preparada".
Por Europa Press / Redacción | Compostela | 27/01/2025 | Actualizada ás 16:17
O presidente do Partido Popular, Alberto Núñez Feijóo, anunciou este luns que as 11 comunidades autónomas gobernadas polo seu partido, incluída Galicia, vacinarán contra o virus respiratorio sincitial (VRS) aos maiores en residencias e pacientes inmunodeprimidos.
"Hoxe damos un paso máis no noso compromiso coa sanidade pública no ámbito da prevención de enfermidades", declarou Feijóo durante unha visita a unha residencia de maiores en Córdoba, na que estivo acompañado polo presidente da Xunta de Andalucía, Juanma Moreno.
Feijóo sinalou que as comunidades gobernadas polo PP, que xa vacinan contra este virus aos máis pequenos, darán un paso máis na prevención e loita contra o VRS vacinando aos maiores que vivan en residencias e pacientes inmunodeprimidos, trasplantados e oncolóxicos. O líder do PP explicou que esta acción coordinada permitirá que a partir de setembro ao redor de 360.000 persoas poidan vacinarse contra o virus, evitando así ata un 77% dos ingresos por este motivo na poboación diana.
"SOLUCIONAR OS PROBLEMAS DA XENTE"
Feijóo afirmou que, "unha vez máis", o PP acredita que o seu obxectivo é "solucionar os problemas da xente e hoxe facémolo en plena gripe en toda España". "Facémolo cunha vacina nova para os maiores que empezaremos a dispensar a partir de setembro", aseverou.
Neste sentido, asegurou que o obxecto desta visita "programada con tempo" a este centro de maiores é "acreditar que hai outra forma de gobernar, que hai outra forma de facer política e que hai unha alternativa preparada". "O Goberno está dedicado aos seus problemas particulares, aos seus problemas xudiciais, á división dentro do Goberno, á falta de apoio parlamentario cos seus socios e por tanto non se pode dedicar aos problemas dos españois", manifestou.
