O PSdeG denuncia que a Xunta “deixa na cuneta” a 13 traballadores da AG-41
A deputada Paloma Castro acusa ao Goberno galego de eliminar postos sen explicación e de ignorar as reclamacións do persoal afectado.
Por Europa Press / Redacción | Santiago de Compostela | 08/08/2025 | Actualizada ás 16:09
O Grupo Socialista rexistrou no Parlamento galego unha iniciativa para instar á Xunta a que "rectifique e corrixa unha decisión" que, afeou, "ninguén entende": "deixar fose 13 traballadores nos novos contratos de mantemento da Autovía do Salnés, a AG-41".
A deputada socialista Paloma Castro apuntou que o Goberno galego publicou en xuño os novos pregos para a conservación da rede autonómica de estradas e, "sen dar moitas explicacións, eliminou 13 postos de traballo no lote 6 (Pontevedra Norte)", onde se integrou o mantemento da AG-41 tras o rescate da concesión. "Son persoas que levan anos facendo o mantemento desta vía. Que pasa agora con elas? Van quedar na cuneta mentres a Xunta di que todo está ben?", preguntouse.
Os traballadores, apunta, "tentaron facelo todo pola vía formal". "Presentaron escritos, esperaron respostas, e mesmo acudiron ao TACGAL para frear o proceso, pero a realidade é que ninguén os escoitou. É desesperante. Porque detrás de cada praza que se suprime hai un nome, unha familia, unha historia", agregou.
O plan dos socialistas inclúe unha proposición non de lei para o pleno, ademais de preguntas e unha interpelación ao Goberno galego. O obxectivo, esgrime, é que a Xunta" modifique os pregos de licitación e recoñeza o dereito á subrogación, como marca a lei e como sería de xustiza".
