Por Europa Press / Redacción | BRUSELAS | 07/03/2025 | Actualizada ás 18:30
A Comisión Europea propuxo este venres unha revisión específica da directiva de hábitats para adaptar as normas comunitarias á rebaixa do status de protección do lobo que a UE logrou en decembro e que entrou en vigor este mesmo 7 de marzo. Tras pasar da categoría de "protección estrita" á de simple "protección" dentro do Convenio de Berna do Consello de Europa, establecido en 1979 e que subscriben 50 membros (incluídos os 27 países da UE), Bruxelas quere traspor este cambio ás normas comunitarias.
A revisión, que debe ser aprobada polo Consello e o Parlamento Europeo, dará máis marxe aos Estados membro para xestionar as súas poboacións locais de lobos, aínda que o lobo seguirá sendo unha especie protexida, polo que as medidas nacionais deberán contribuír a manter un estado de conservación favorable. De feito, a Comisión sinalou que os investimentos en medidas adecuadas de prevención de danos seguirán sendo "esenciais" para reducir os ataques ao gando e garantiu que continuará prestando a súa axuda aos Estados membro no deseño e a aplicación de ditas medidas mediante financiamento e outras formas de apoio.
"Nalgunhas rexións europeas, as mandas de lobos convertéronse nun verdadeiro perigo, especialmente para o gando. Hoxe propomos un cambio na lexislación da UE que axudará ás autoridades locais a xestionar activamente as poboacións de lobos, protexendo ao mesmo tempo a biodiversidade e os nosos medios de vida rurais", declarou a presidenta da Comisión, Ursula von der Leyen. A política alemá xa anunciou en novembro de 2022 a súa intención de encargar aos servizos comunitarios unha "análise en profundidade" sobre o impacto da recuperación do lobo nos campos da UE. A toma de posición da política alemá produciuse pouco despois de que, segundo relatou máis tarde a prensa do seu país, un lobo matase un poni da súa propiedade.
INVESTIGACIÓN DA DEFENSORA DO POBO
Polo seu lado, a Defensora do Pobo da Unión Europea, Emily O'Reilly, decidiu abrir unha investigación sobre a recolección de datos realizada polo Executivo comunitario para pedir esa rebaixa do status de protección internacional do lobo. O Executivo comunitario analizou máis de 17.000 achegas de comunidades locais, científicos e partes interesadas sobre as regras de protección do lobo na UE solicitadas a través da enquisa lanzada en setembro de 2023, uns datos nos que se baseou para presentar unha proposta para modificar o seu status de protección. A investigación abriuse en novembro de 2024 en base a unha queixa da ONG Client Earth, que acusaba "falta de fundamento científico, un proceso de consulta problemático, falta de acceso aos documentos e dúbidas sobre as motivacións da degradación" do status de protección da especie por parte da Comisión Europea.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.