Trump perde a súa primeira batalla económica e pausa durante 90 días os aranceis, menos a China
Aumenta a 125% os aranceis a China logo de que o xigante asiático non cedese a súa chantaxe.
- Facer Estados Unidos grande outra vez... a costa de todos: "Non se pode dirixir un país coma se fose unha empresa"
- Como actuar ante a tolemia arancelaria de EE.UU.? "A UE debe estar unida e empezar a negociar con outros países"
Por Europa Press / Redacción | MADRID | 09/04/2025 | Actualizada ás 20:50
O presidente de Estados Unidos, Donald Trump, anunciou este mércores unha pausa de 90 días na aplicación dos aranceis decretados o 2 de abril a todos os países que iniciaron negociacións para abordar as súas disputas comerciais e a súa substitución temporal por un gravame do 10%, á vez que anunciou un incremento ao 125% dos aranceis para China. É a primera derrota económica que sofre o populista norteamericano que chegou a dicir que había países "que lle bicaban o cú" tras impoñer os aranceis. Pero o non de China e o afundimento do mercado fixeron que tivera que parar máquinas.
"Máis de 75 países chamaron a representantes dos Estados Unidos [...] para negociar unha solución aos temas que se están debatendo en relación co comercio [...]. Para as nacións que por suxestión miña non tomaron represalias de ningún tipo contra os Estados Unidos autoricei unha pausa de 90 días e un arancel recíproco notablemente reducido durante este período do 10%", informou Trump mediante un post na rede social 'Truth Social'.
Na mesma publicación, o mandatario elevou ao 125% os aranceis para o xigante asiático, ao que acusou de "faltar o respecto aos mercados", despois de que Pequín decidise responder á entrada en vigor dos aranceis adicionais "recíprocos" de Washington subindo ao 84% as tarifas sobre as mercadorías estadounidenses.
"Baseándome na falta de respecto que China mostrou aos mercados mundiais, pola presente elevo o arancel cobrado a China polos Estados Unidos de América ao 125% con efecto inmediato. Nalgún momento, esperemos que nun futuro próximo, China darase conta de que os días para estafar á EE.UU. e outros países xa non son sustentables ou aceptables", engadiu.
Do seu lado, o secretario do Tesouro de EE.UU. Scott Bessent, sinalou nunha comparecencia ante os medios que "con esta decisión engadimos certidume a un momento inestable", e reafirmou que Estados Unidos está "absolutamente disposto" a negociar con cada un dos 75 países que mostraron á Administración estadounidense a súa disposición ao diálogo.
