A oposición acusa de "opacidade" na xestión de Recursos de Galicia e a Xunta escúdase en que é privada

A oposición levou ao Parlamento galego a "opaca" entidade público-privada Recursos de Galicia, á que tachan de "chiringuito" no que a Xunta buscou "fuxir" dos controis públicos. En cambio, o secretario xeral de Industria, Nicolás Vázquez, escudouse en que se trata dunha sociedade "privada" na que Xunta só conta co 30% do capital, polo que "non é unha mercantil que forme parte do sector público autonómico".

Na Comisión de Industria, tanto BNG como PSdeG levaron senllas preguntas para pedir explicacións á Xunta sobre o que consideran unha sociedade con "cero transparencia". Así, esgrimiron o recente "tirón de orellas" do informe do Consello de Contas no que pide ao Goberno galego transparentar e someter a control público tanto a actuación de Recursos de Galicia como da sociedade Impulsa.

Brais Ruanova (BNG) alertou de que é "imposible fiscalizar" a Recursos de Galicia, que crearon antes da propia lei de beneficios de proxectos naturais que a ampara porque tiñan "moita présa" en "repartir carguitos". Censura que a Xunta se nega a controlar unha sociedade que tiña como sede social na súa creación "dependencias da Administración galega", ademais dunha participación pública do 30%, coa Xunta como principal accionista.

O deputado nacionalista identifica a "política de despachos e con cero transparencia" da Xunta tamén co que ocorre coa sociedade Impulsa Galicia, de creación "abrupta e opaca" que conta cun "acordo secreto" coa "megacelulosa" de Altri. Lamenta que Recursos de Galicia vai elixir "onde é adecuado asentar unha mina" de costas a un control público, á vez que lanzou dúbidas sobre o "baile de cifras de investimentos" que ofrecen estas empresas.

"Non querían os controis públicos", denunciou a deputada socialista Patricia Igrexas para resumir a actuación da Xunta con esta entidade en cuxo consello de administración sentan conselleiros, pero na que non hai "rendición de contas" ao público nin en selección de persoal ou contratación externa.

Igrexas pregúntase "que ten que esconder" o Executivo de Alfonso Rueda para tal "opacidade", pois acusa á Xunta de "fuxir" do dereito administrativo con esta sociedade. Recrimina que Contas confirma "auténticos chiringuitos sen control publico", un ente fiscalizador que solicitou os pactos entre socios pero "non se lle entregou".

Tamén arremeteu a deputada socialista contra que "ningunha das promesas do CEO optimista" de Recursos de Galicia "cumpríronse". "Tampouco foi eficiente", reprende.

A XUNTA DEFENDE QUE SE CUMPRE A LEI

En fronte, o secretario xeral de Industria, Nicolás Vázquez, acusa á oposición de "xogar ao descoido" e remarca que este é un "Estado de dereito" no que a Xunta cumpre a lei, polo que Recursos de Galicia trátase dunha empresa "privada" que non se rexe pola lei de administracións pública galegas.

Defende que a participación "minoritaria do 30%" da Xunta "supón que non ten o control público", con tres membros do Goberno galego nun consello de administración con 15 compoñentes. Indica que a selección do conselleiro delegado (CEO polas súas siglas en inglés) non se fixo por unha selección de emprego público, senón por unha entidade de "procura de talento e perfís de directivos", do mesmo xeito que para o resto de persoal buscáronse "perfís idóneos".

Sobre o informe de Contas, Vázquez afirma que, "sinceramente, fai consideracións erróneas". Afea que o órgano fiscalizador se base en "medios de comunicación", o que ve un "curioso" razoamento no que bota falta maior peso xurídico. Agrega que o Goberno galego "non está conforme coa interpretación que se está facendo" por parte do Consello de Contas. Admite que Recursos de Galicia creouse antes da lei de beneficios de proxectos naturais, pero fíxose "sen incumprir ningunha normativa", só para "ir rápido" no seu funcionamento.

"Non é que vaia a controlar onde se implanta unha mina", replica o alto cargo da Xunta, senón que é unha sociedade privada que vai actuar no mercado pero con "fins distintos e máis beneficios de face á sociedade galega que outras sociedades que estean a operar no mercado".

"Onde ven vostedes que se están pasando a Recursos de Galicia potestades públicas?", pregúntase. "Tratamos de lear para que despois esteamos todos perdidos neste vórtice", reprocha Nicolás Vázquez á oposición.

Firma do protocolo entre Xunta e Recursos de Galicia. XUNTA | Fonte: Europa Press