Formoso reclama un proxecto "ambicioso" para modernizar a liña férrea entre Ferrol e Coruña
Valentín González Formoso insistiu en reducir "os tempos de viaxe" para que o tren sexa "un medio de transporte competitivo", tanto para o desprazamento de persoas como de mercadorías
Por E.P. | A CORUÑA | 28/05/2025 | Actualizada ás 18:22
O presidente da Deputación da Coruña, Valentín González Formoso, reclamou este mércores en Ferrol un proxecto "ambicioso" de modernización da vía férrea que conecta a cidade naval coa Coruña que non se limite a "parches ou remiendos".
O máximo responsable da institución provincial pronunciouse sobre a reunión que o martes mantiveron en Madrid o alcalde de Ferrol, José Manuel Rey, e os portavoces dos catro grupos municipais co director xeral do sector ferroviario para reclamar melloras urxentes na liña.
Actualmente, o tempo da viaxe entre ambas as localidades supera os 80 minutos. "Esiximos o mesmo trato para Ferrol que se lle dá ao resto das cidades galegas", asegurou González Formoso, que lembrou que a vía está "sen tocar desde fai practicamente cen anos".
Ademais, insistiu en que o proxecto ten que ser "ambicioso" co obxectivo de reducir "os tempos de viaxe" para que o tren sexa "un medio de transporte competitivo", tanto para o desprazamento de persoas como de mercadorías.
O presidente provincial non se pronunciou sobre aspectos que, dixo, "teñen que resolver os técnicos", pero, en todo caso, reiterou que reducir unicamente en 15 minutos (en alusión ao by-pass de Betanzos) "non vai permitir que sexamos competitivos".
