Premios á Transferencia de Tecnoloxía: aeroxeles estériles para implantes óseos e nova terapia antiobesidade

A Real Academia Galega de Ciencias (RAGC), en colaboración coa Axencia Galega de Innovación, fallou os Premios á Transferencia de Tecnoloxía en Galicia 2025, e recoñeceu o traballo dos investigadores que desenvolveron os aeroxeles estériles, e dos que traballan nunha nova terapia contra a obesidade. Os proxectos recibirán un premio de 5.000 euros cada un nun acto que se celebrará en Santiago de Compostela o 11 de xuño.

Así, outorgouse o premio 'Francisco Guitián Ojea' a un traballo de investigación sobre a produción sustentable de materiais porosos estériles para aplicacións biomédicas, dun grupo da USC liderado por Carlos García, cun proxecto encadrado na investigación predoutoral de María Carracedo. Trátase do desenvolvemento de aeroxeles para o seu uso biomédico, para o que deben cumprir uns criterios de esterilidade. Os investigadores da USC lograron, por primeira vez, a produción destes materiais estériles, abrindo as portas ao seu uso en implantes óseos, administración pulmonar de medicamentos ou tratamento de feridas.

Este novo material xa foi patentado, e trátase dunha solución industrial prometedora e viable desde o punto de vista tecnolóxico e o económico. Na actualidade está en fase de valorización tecnolóxica, en colaboración con empresas galegas para a súa transferencia. O traballo é froito da colaboración durante máis dunha década de tres grupos de investigación da USC pertencentes á facultade de Farmacia, ao iMATUS (Instituto de Materiais), iARCUS (Instituto do Medio Acuático para unha Saúde Global) e CiMUS (Centro Singular de Investigación en Medicamento Molecular e Enfermidades Crónicas).

Por outra banda, o Premio 'Fernando Calvet Prats' foi para o grupo de investigación NeurObesity do Centro Singular de Investigación en Medicina Molecular e Enfermidades Crónicas (CiMUS) da Universidade de Santiago, coordinado por Miguel López, catedrático de Fisioloxía da USC e referente mundial no campo da obesidade e a neurociencia metabólica. A tecnoloxía premiada transferiuse a Gazella Biotech e o proxecto baséase nunha nova terapia contra a obesidade, baseada en vesículas extracelulares pequenas para abordar os mecanismos centrais que modulan o equilibrio enerxético, como unha alternativa de altísimo potencial para tratar esta enfermidade e as súas comorbilidades.

Esta tecnoloxía xa está protexida por unha solicitude de Tratado de Cooperación en Patentes e a empresa ten outras dúas patentes asociadas en proceso de revisión. O obxectivo é completar as actividades preclínicas e dar os primeiros pasos cara ao desenvolvemento clínico desta nova terapia. Nos ensaios preclínicos xa mostrou resultados prometedores: logrou mellorar cocientes de obesidade e metabolismo tanto en ratos obesos inducidos por dieta como en ratos obesos xenéticos, sen efectos adversos.

Imaxe dun laboratorio | Fonte: UVIGO - Arquivo