Unanimidade na Cámara para instar ao goberno a dotar de fondos a Lei ELA

Todos os grupos parlamentarios que compoñen a Cámara galega votaron a favor dunha proposta do PPdeG para instar o Goberno central a dotar de fondos a Lei ELA para que "sexa efectiva" e poida "cumprir os seus obxectivos". Así, os populares presentaron unha proposición non de lei tras advertir que esta norma "sen financiamiento" queda en "unha simple declaración de intencións" e non mellora a situación das persoas que padecen esta enfermidade e dos seus familiares". Por iso, a proposta do PPdeG, aprobada co apoio de todos os grupos, insta á Xunta a demandar ao Goberno a que dote de fondos económicos esta Lei para que sexa "realmente efectiva" e cumpra "cos obxectivos para os que foi aprobada".

CREACIÓN DE UNIDADES COVID PERSISTENTES

Doutra banda, o Grupo Parlamentario Popular rexeitou unha iniciativa do PSdeG para instar á Xunta a "reconsiderar a decisión de pechar as unidades postcovid". Neste caso, a proposición non de lei, que contou co apoio de nacionalistas e do deputado de Democracia Ourensá, pretendía que se realizase un censo territorial de persoas afectadas por covid persistente. Tamén demandaba que se formase ao persoal sanitario naqueles centros de saúde nos que existan persoas con Covid persistente e realizar o resto da formación a todo o persoal sanitario.

Pleno do Parlamento de Galicia, a 6 de maio de 2025 | Fonte: PARLAMENTO