Denuncian as condicións laborais de traballadores a máis de 25 graos nas instalacións de Celtic Estores en Moraña

Comisiones Obreras (CC.OO.) denunciou a "ausencia dun sistema de refrixeración axeitado" nas naves de Celtic Estores, no municipio pontevedrés de Moraña, que provocan que traballar resulte "inhumano e mesmo perigoso para a saúde das traballadoras". Segundo trasladou o sindicato nun comunicado, segundo unha guía do Observatorio de Saúde e Cambio Climático "28 graos en Galicia poden ser peores para a saúde que 37 graos en Andalucía".

Nesta liña, informaron que desde a denuncia realizada polo sindicato hai 10 días, a empresa dedicouse a pór "medidas paliativas", que "en ningún caso conseguen que a temperatura máxima se aproxime, sequera, aos 25 graos que establece a lexislación". Desta maneira, continuaron, "no canto de suspender a quenda de tarde provisionalmente, obriga a realizar a actividade laboral en condicións de ilegalidade", sobre as que "tampouco actuou aínda a Inspección de Traballo".

Comisiones Obreras subliñou que a "actuación irresponsable que mantén a empresa resulta unha verdadeira declaración de intencións na que se prima a produción, aínda que sexa á conta da saúde". Así mesmo, destacou que a ausencia de refrixeración das naves "repítese cada verán e que a empresa non o resolve", a pesar de requirimentos anteriores da Inspección de Traballo. Polo que, solicitou a esta que "dea un paso máis e proceda a sancionar á empresa, ademais de esixirlle a instalación dun sistema axeitado nun curto período de tempo".

Celtic Estores Bandalux, en Moraña | Fonte: Google Maps - Arquivo