Falece Maribel Permuy, nai de José Couso, o cámara de televisión ferrolán asasinado por tropas de EE.UU. na guerra de Iraq

Maribel Permuy, nai do cámara de televisión ferrolán José Couso asasinado por tropas estadounidenses na guerra de Iraq en 2003, faleceu. Diso informa Esquerda Unida Ferrol nun comunicado este xoves, no cal lamenta a morte desta muller que protagonizou unha "incansable loita" en busca de "verdade, xustiza e reparación" para o seu fillo.

O partido político subliña que o asasinato de José Couso "segue impune 22 anos despois pola complicidade de todos os gobernos que non son capaces de recoñecer o que alí pasou e de culpar ao verdadeiro responsable desta traxedia". Para Esquerda Unida, Maribel Permuy é "un gran exemplo de loita e de dignidade" e "nunca será esquecida". A formación enviou a súa "fortaleza e agarimo" á familia e amizades de Permuy nestes duros momentos.

Familiares e amigos de José Couso esixen un ano máis 'investigación e xustiza' durante unha concentración no 20 aniversario do falecemento do xornalista José Couso, fronte á embaixada de Estados Unidos, a 22 de abril de 2023, en Madrid | Fonte: Matias Chiofalo - Arquivo