A Faba de Lourenzá recibirá axudas de Medio Rural
Recibirá axudas específicas e medidas para formación, investigación e comercialización.
Por Europa Press / Redacción | SANTIAGO DE COMPOSTELA | 11/08/2025 | Actualizada ás 17:53
A conselleira do Medio Rural, María José Gómez, subliñou este luns o seu apoio á Faba de Lourenzá con axudas específicas e medidas para formación, investigación e comercialización. Tal e como trasladou a Xunta nunha nota de prensa, Gómez destacou a faba como un produto agroalimentario galego de calidade diferenciada, durante unha visita a Fabas Alma do Val, produtora e comercializadora amparada pola Indicación Xeográfica Protexida (IXP).
Durante a súa intervención, a titular de Medio Rural salientou as axudas aos produtores de IXP, que se convocaron este ano por primeira vez e veñen de percibir un total de 18 faberos, todos os inscritos no Consello Regulador que cumprían os requisitos da convocatoria. En conxunto, percibíronse 68.000 euros e a resolución publicarase no Diario Oficial de Galicia (DOG) este mércores.
Así mesmo, a conselleira explicou que estas axudas se enmarcan nun contexto "complexo" para o sector, marcado polas "malas colleitas" dos anos 2023 e 2024, que "obrigaron a refugar unha parte importante da produción por mor das condicións climáticas adversas".
