Vaipolorío pecha 25 anos de limpeza do Gafos con máis de 1,2 toneladas de lixo retirado

O colectivo Vaipolorío pechou a súa XXV Campaña de limpeza do río Gafos retirando máis de 300 quilos de residuos na ponte do Couto, o que eleva a 1,23 toneladas o total recollido nas seis xornadas desenvolvidas desde o 27 de xullo. O coordinador, Xosé Feijóo, salientou que tras 25 anos de traballo o río “é máis respectado” pola cidadanía, aínda que boa parte do lixo segue sendo antigo e aflora coas enchentes invernais.

Entre o material extraído, que será tratado pola empresa concesionaria da limpeza municipal, había rodas, tubos de plástico, calzado e numerosos restos de electrodomésticos, incluídos varios televisores. O tramo máis complicado foi o último, onde ata marzo de 2024 existía un asentamento chabolista xa desaloxado. Ademais, a campaña deixou incidencias como a mortaldade de peixes pola falta de osíxeno en determinados puntos, situación que obrigou á Xunta a trasladar exemplares río arriba.

Vaipolorío tamén puxo o foco na ponte medieval do Couto, deteriorada pola falta de conservación. A entidade leva anos reclamando a súa rehabilitación e insta ás administracións a promover un estudo arqueolóxico que permita poñela en valor como patrimonio histórico e como vía de conexión coa estación de autobuses e a avenida Josefina Arruti. O colectivo volverá a este punto o 21 de setembro, na xornada de Limpeza Simultánea que coordina ADEGA co Proxecto Ríos.

A campaña contou cunha media de 17 a 28 voluntarios cada domingo e sumou apoios doutras entidades como o colectivo Capitán Gosende, Fundación Xoán XXIII e Cruz Vermella. De face ao futuro, Vaipolorío prevé reforzar a investigación e divulgación arredor do Gafos con estudos sobre líquenes, vocabulario tradicional vinculado ao río e coa esperanza de que arrinque o proxecto de renaturalización en Campolongo e o plan de conservación do espazo natural aprobado en 2019.