O líder do Partido Popular, Alberto Núñez Feijóo, e os presidentes autonómicos do seu partido subscribiron este domingo en Murcia un documento no que demandan ao Goberno central que asuma "a atención e financiamento directo" dos menores migrantes non acompañados, ante a "saturación" dos recursos das comunidades. Tamén reclaman que, cando sexa posible, se promovan o "retorno" e a "reunificación familiar" nos países de orixe.
Segundo a Declaración da rexión de Murcia, "a xestión dos menores non pode ser o froito dunha repartición arbitraria nin un instrumento de negociación política cos socios separatistas". O PP responsabiliza a Pedro Sánchez do "fracaso na política migratoria" e esixe que o Executivo garanta a determinación de idade dos menores e financie de maneira directa a súa atención.
No mesmo documento, os populares expresan o seu "absoluto rexeitamento á violencia machista" e amosan "preocupación polo retroceso en igualdade". Como exemplo, citan os problemas detectados no sistema telemático COMETA, de control de agresores, e piden a destitución da ministra de Igualdade, Ana Redondo, a quen acusan de "neglixencia". Reclaman ademais responsabilidades aos ministros de Interior e Xustiza e unha auditoría externa do sistema.
Feijóo tamén criticou que o Goberno gastase "2,8 millóns de euros nunha campaña sobre masturbación en maiores de 60 anos" mentres, ao seu xuízo, se recortan contratos de pulseiras contra malos tratos ou indemnizacións polo atraso do AVE.
Os populares aproveitaron a declaración para insistir na necesidade dun Plan Nacional de Infraestruturas e advertiron sobre a "mala planificación" de AENA, que, segundo din, causa colapsos en terminais saturadas e perda de conexión nos aeroportos periféricos. Ademais, urxiron a modernizar a Lei de Contratos do Sector Público, que consideran un freo á execución de proxectos e á competitividade empresarial.
Outro dos puntos centrais é a proposta dun Pacto Nacional da auga, dotado con 40.000 millóns de euros, para garantir planificación hídrica, infraestruturas e técnicas de reutilización. Feijóo defendeu que esta política debe asegurar "solidariedade entre territorios" e apoiar o medio rural.
Por último, o PP comprométese a impulsar unha Lei de Fiscalidade Agraria para recoñecer o sector primario como estratéxico e avanzar na redución de impostos, tanto desde as comunidades autónomas como desde un futuro Goberno central encabezado polos populares.
