A CIG acusa de "abusivos" os servizos mínimos da Xunta de cara os paros a favor de Palestina
A representación da CIG que participou este xoves en Santiago na reunión para abordar os servizos mínimos cualifica de "verdadeiro paripé" o encontro, e asegura que os responsables da Xunta "limitáronse a trasladar a proposta sen entrar a valorar as achegas das organizacións sindicais"
Por Europa Press / Redacción | SANTIAGO DE COMPOSTELA | 09/10/2025 | Actualizada ás 16:20
A CIG considera "esaxerada e abusiva" a proposta de servizos mínimos da Xunta en relación co paro xeral en solidariedade con Palestina convocado para o vindeiro mércores 15. Respecto diso, anuncia a impugnación xudicial no caso de que a administración non rectifique.
Nun comunicado, a central nacionalista afirma que a proposta de servizos mínimos "persegue claramente impedir o exercicio do dereito de folga".
A representación da CIG que participou este xoves en Santiago na reunión para abordar os servizos mínimos cualifica de "verdadeiro paripé" o encontro, e asegura que os responsables da Xunta "limitáronse a trasladar a proposta sen entrar a valorar as achegas das organizacións sindicais".
"Quedou claro que a Administración non sentou coa vontade de escoitar á parte social e que participou na reunión por obrigación legal, xa que nin sequera fixeron comentarios a respecto das nosas valoracións, como si pasou outras veces", denuncia a secretaria confederal de organización da CIG, Susana Méndez.
A central incidiu en que "non é necesario establecer servizos mínimos para os paros de catro horas por quenda de traballo convocados pola CIG", tendo en conta que a prestación dos servizos mínimos, asegura, "non se vai a ver afectada".
Méndez lembrou que decretos anteriores de folgas e paros parciais foron anulados nos tribunais e esixe "servizos mínimos dimensionados" e que non se publique o día antes do paro.
E a CIG sinala "exemplos pintorescos" destes servizos mínimos como os relativos aos centros de investigación agroforestal, os servizos periféricos dalgunhas consellerías e a Axencia Tributaria, "que aumentan mesmo o número de traballadores".
