Un xulgado obriga a Abalda a devolver 564.000 euros ao Consorcio das Mariñas

O Xulgado do Contencioso-Administrativo número dous da Coruña fallou a favor do Consorcio das Mariñas tras o recurso de lesividade interposto por este sobre as resolucións de pagamento á UTE Albada, que xestiona a planta de Nostián, correspondentes aos meses de novembro e decembro de 2011 e ao ano 2012 completo.

Froito desta sentenza, Albada terá que devolver ao Consorcio "a cifra de 564.393,91 euros, correspondentes á xestión dos rexeitamentos de lixo que nese período non asumiu", explica este ente que integra a municipios da área coruñesa.

O conflito entre o Consorcio As Mariñas e Albada comezou en 2011, "cando a empresa pretendía impoñer un sobrecoste pola xestión dos rexeitamentos, malia que o servizo xa ía incluído no contrato. O Consorcio non aceptou a decisión e, en outubro deste ano, Albada decidiu non asumir os rexeitamentos, "obrigando o ente supramunicipal a levalos a outro vertedoiro".

"Malia isto, a UTE seguiu facturando o servizo completo, incluíndo a xestión de rexeitamentos que non acometían", engade o Consorcio, e concreta que aboou 2.615.746,55 euros a Albada polos servizos entre xaneiro e outubro de 2012 e 1.120.436,34 euros polos servizos de novembro e decembro de 2011 e 2012.

Do contido da sentenza, destaca que o xuíz considera acreditado que foi "unha decisión unilateral da demandada a que motivou a xestión dos rexeitamentos por unha terceira mercantil".