O encaixe de Camariñas inicia en Fitur a súa carreira por converterse o próximo ano en Festa de Interese Nacional

O encaixe de Camariñas está presente dentro do stand de Galicia na Feira Internacional de Turismo de Madrid, Fitur, co obxectivo de iniciar a súa carreira por converterse o próximo ano en Festa de Interese Nacional.

Até o domingo, día 21, todos os asistentes a Fitur poderán gozar na caseta de Galicia do encaixe de Camariñas, unha pequena mostra da artesanía centenaria que serviu de sustento á actividade económica da localidade durante séculos.

"Loitamos cada día por manter unha tradición que forma parte da vida de Camariñas e para que poida seguir sendo o noso motor económico", en palabras de Beatriz Dios, profesora de encaixe e unha das artesás presentes en Fitur 2018.

Esta presentación en Madrid é a antesala da Mostra do Encaixe 2018, que se celebra en Camariñas en Semana Santa desde 1991 e na que se dan cita miles de persoas, entre artesás e público. Actualmente, o municipio conta con máis de 2.000 'palilleiras' locais.

O obxectivo da difusión desta actividade é conseguir que a mostra desta disciplina sexa recoñecida como Festa de Interese Nacional en 2019.