Por E.P. | Santiago de Compostela | 25/07/2018 | Actualizada ás 12:08
A secretaria xeral de Pesca, Alicia Villauriz, informou este martes das propostas que conxuntamente presentaron España e Portugal á Comisión Europea para evitar o peche da pesqueira da sardiña no segundo tramo de campaña, após unha reunión celebrada pola secretaría con representantes de sector e das comunidades autónomas.
O pasado 15 de xaneiro, España e Portugal presentaron á DG Mare, organismo responsable das políticas da Comisión sobre asuntos marítimos e pesca, un plan conxunto de xestión e recuperación da sardiña ibérica. Nel, ademais de medidas estritas de control e de xestión da pesqueira, establecíase un tope máximo de capturas de 14.600 toneladas para ambos os países.
Este quedou dividido en dous tramos: o primeiro de 7.300 toneladas a pescar desde o 1 de maio até o 31 de xullo; e o segundo, doutras 7.300 toneladas, a pescar desde o 1 de agosto até o 31 de outubro, pero condicionado a que a biomasa crecese un 10% anual.
O Consello Internacional de Exploración do Mar (ICES) publicou o 13 de xullo unha nova avaliación que sinalaba que a pesqueira non se recuperou de forma satisfactoria e, en todo caso, non alcanzaría o obxectivo do 10% de crecemento da biomasa, establecido no plan como condicionante para poder utilizar a segunda metade da cota para o período de agosto a outubro de 2018.
"PREOCUPANTE" SITUACIÓN DA SARDIÑA
Neste contexto, España e Portugal sinalaron que a situación da sardiña é aínda "preocupante", dado que a biomasa está en niveis moi baixos e fóra de límites biolóxicos de seguridade. Os dous países acordaron presentar á Comisión un reforzamento das medidas do plan de xestión que poida evitar o peche, permitindo ao sector pesqueiro desenvolver a súa actividade cunha redución da cota prevista, en aras de amortecer o impacto socioeconómico dun peche en plena campaña de verán.
A secretaria xeral informou de que estaba á espera da resposta de Bruxelas ante esta proposta e que, aínda que tiña signos positivos de que puidese manterse a pesqueira aberta durante polo menos o mes de agosto, non podía aínda avanzar a contía da cota reducida até non ter a resposta da UE, comprometéndose a comunicala nos próximos dous días.
Ademais, Villauriz explicou que España e Portugal comprometéronse a reforzar as campañas de investigación da pesqueira para consolidar os datos dispoñibles, que deberían contribuír a mellorar a avaliación do estado do stock para o ano 2019.
ICES publicou tamén dous consellos positivos recomendando subidas para as capturas de xurelo e anchoa ou boquerón, capturadas polas frotas de sardiña, que sen dúbida axudarán en gran medida a contrarrestar os efectos da redución desta pesqueira de sardiña.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.