Bescansa non considera Galicia un retiro dourado e quen o diga "non reflexionou"

A cofundadora de Podemos, Carolina Bescansa, asegurou que "calquera que pense que a situación de Galicia é para facer un retiro dourado é que coñece moi pouco Galicia" ou que "non reflexionou moito", en resposta ás afirmacións realizadas polo deputado Antón Gómez-Reino, co que se medirá para liderar a formación morada en Galicia.

"Calquera que pense que este é un marco fácil, penso que non reflexionou moito sobre cal é a situación aquí, que significa Feijóo, que é o PP aquí e os seus efectos, o clientelismo, como se aplicaron aquí os recortes", replicou, en entrevista en RNE en Galicia, cuestionada directamente sobre a afirmación de Gómez-Reino de que Galicia non podería ser o "retiro dourado ou o plan B de ninguén".

Ante estas afirmacións, Bescansa, sen citar a Gómez-Reino, puxo o acento na situación de Galicia baixo a presidencia de Feijóo, ao que acusou de "non só non ter empatía coa xente para darse conta do que isto supón, senón que tamén saca peito de todo iso, é unha situación moi difícil, non é un retiro dourado, é un sitio para traballar moitísimo para pór fin a isto".

E a pesar das dúbidas suscitadas pola súa candidatura, ao ser deputada en Madrid e profesora da Universidade Complutense, remarca que nunca sentiu que se marchase de Galicia. "Non sinto que volva porque nunca marchei".

Ante as declaracións de Feijóo, criticando que o líder de Podemos cuestionase a candidatura de Bescansa por vivir en Madrid, cre que se trata só "dunha forma clásica de oportunismo, de aproveitar o río revolto" e pide respecto para os procesos internos de cada partido.

A 'ASEMBLEA' "NON COMEZOU BEN"

A deputada e candidata a Podemos Galicia sostén que a Asemblea Cidadá de Galicia, que finalizará coa proclamación de resultados o 25 de outubro, "non comezou ben" pero deixa caer que ten "moita confianza" en que se desenvolva con "neutralidade, respecto" e "recoñecemento á pluralidade que corresponde a unha organización democrática" como Podemos.

Carolina Bescansa móstrase así disposta a pelexar por encabezar a secretaría xeral de Podemos Galicia, e enlaza cualificativos para valorar o chamamento que recibiu por parte da anterior dirección liderada por Carmen Santos: "É un privilexio e unha fortuna que agora podo asumir esa responsabilidade, antes non podía, agora si podo e é unha enorme honra".

Un reto que asume con "enorme ilusión" e que percibe que foi ben acollido, con mostras de apoio "na rúa" por parte daqueles que cren que poderá contribuír a finalizar cos mandatos do PP no goberno autonómico. "A xente pensa que eu podo axudar a botar a Feijóo da Xunta" e ao "PP dos concellos", e "iso dáme máis forzas para tirar cara a adiante e axudar", asegurou.

Na súa intervención, as críticas viraron en reiteradas ocasións cara ao PPdeG, ao que reprocha que "non só" non teña "proxecto de país" en Galicia, algo que "é terrible", senón tamén "falta de sensibilidade, de corazón", por non entender o que os recortes significan en educación, sanidade ou universidade pública.

CANDIDATA Á XUNTA: "XA VEREMOS", "AÍNDA QUEDA TEMPO"

Eludiu, con todo, pronunciarse claramente se entre os seus obxectivos figura ser candidata á Xunta de Galicia. Bescansa opta por reducir o horizonte temporal, á espera de ser escollida como secretaria xeral -as votacións serán entre o 18 e o 25 de outubro--. Despois, "lamentablemente, aínda queda tempo longo para porlle fin á etapa Feijóo e a abrir etapa pos-Feijóo". "Primeiro os compañeiros teñen que escollerme e despois xa veremos, cando veñan as cousas, xa virán, agora toca facer un chamamento á votación", puntualiza.

Cuestionada sobre a súa intención sobre as formacións de unidade popular de cara ás eleccións municipais, responde que priorizará "o modelo programático" por enriba das fórmulas xurídicas e censura que o tempo que se perde en debater estruturas xurídicas non se lle dedique ás políticas.

En todo caso, respectará a postura adoptada en Podemos Galicia en canto ao posible mantemento da súa marca nalgúns concellos nas próximas municipais e, aínda que defende que "hai concellos con partidos instrumentais moi consolidados", como o caso de Santiago, que cita expresamente, hai "outros que non", co que ve un "horizonte municipal" "moi desigual".

No entanto, preguntada precisamente sobre Martiño Noriega e as especulacións existentes sobre o seu suposto interese en ser candidato á Xunta de Galicia, responde defendendo que ten "moita admiración e respecto" cara ao rexedor compostelán e que "o traballo con Martiño vai ser moi fácil".

PODEMOS GALICIA: "GALEGUISTA E SOBERANISTA PERO NON INDEPENDENTISTA"

A súa proposta para facerse coa secretaría xeral de Podemos Galicia céntrase no "reforzamento, en darlle forza á organización", cun partido "máis forte, feminista", "aberto á sociedade, á administración, á universidade, aos centros de I+D+i, ás traballadoras e ás empresas", que será "galeguista e sempre soberanista" pero aclara: "Se me preguntas se somos independentistas xa lle digo que non".

Bescansa propón unha dirección de Podemos que non só incorpore ás persoas da formación, senón que tamén se abra á sociedade civil, á administración pública, a universidade, empresas, sindicatos, I+D+i, porque "os partidos como máquinas en si mesmos non son a solución".

Tamén confía en ter unha "relación moito máis estreita cos parlamentarios" no Parlamento galego e avanza que, en caso de ser escollida, realizará unha "gran conferencia" ao redor do nadal para realizar "propostas moi ancoradas na realidade", desde o proxecto produtivo até as políticas laborais, de educación ou feministas, con participación non só de Podemos senón tamén da sociedade civil.