Por E.P. | SANTIAGO DE COMPOSTELA | 25/01/2019 | Actualizada ás 11:26
A Consellería de Educación publicou no Diario Oficial de Galicia a convocatoria de axudas para 142 bolsas que permiten a estancia de alumnos universitarios nalgún estado da Unión Europea durante o verán deste ano para perfeccionar un idioma estranxeiro.
O Diario Oficial de Galicia publicou a convocatoria para estudantes do Sistema Universitario de Galicia (SUG), que conta cunha dotación orzamentaria total de 142.000 euros. As axudas teñen un importe de 1.000 euros por persoa.
A convocatoria ten como obxectivo facilitar aos alumnos universitarios cumprir cos requisitos e necesidades creadas polo Espazo Europeo de Educación Superior, que esixe o coñecemento dunha segunda lingua para mellorar a competencia e a capacidade de estudo e traballo no contexto internacional.
Nese sentido, os solicitantes deberán acreditar que realizarán un curso de idiomas cunha duración mínima de tres semanas, excluíndo as datas da viaxe, e un mínimo de 15 horas lectivas semanais. O idioma que se desexe cursar deberá corresponderse co oficial do país elixido.
As solicitudes presentaranse obrigatoriamente por medios electrónicos a través do formulario normalizado, dispoñible na sede electrónica da Xunta de Galicia. Poderán solicitar as axudas universitarios que estean matriculados no curso 2018/2019, como mínimo en 50 créditos, en calquera das universidades do SUG, en estudos universitarios oficiais de titulación de grao.
Os aspirantes deberán superar 60 créditos con anterioridade á data de publicación da orde na titulación que estean a realizar. Non poderán optar a esta convocatoria os estudantes que foran beneficiados cunha bolsa do programa comunitario de mobilidade Erasmus+ neste curso, a condición de que a estancia que pretendan realizar sexa para perfeccionar a lingua oficial do país no que están a desenvolver o programa nin o alumnado que xa fose beneficiario desta axuda en convocatorias anteriores.
Desde a posta en marcha da convocatoria, no curso 2011/2012, beneficiáronse un total de 839 universitarios galegos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.