Galicia prepárase para outro golpe de vento e choiva: aviso laranxa na costa e choivas intensas no interior
A AEMET activa alertas por temporal costeiro na Coruña e a Mariña lucense, mentres unha fronte húmida deixará precipitacións fortes e vento en boa parte do territorio durante a tarde do mércores.
Por Europa Press / Redacción | SANTIAGO DE COMPOSTELA | 21/10/2025 | Actualizada ás 15:17
Galicia terá activos este mércores, con especial influencia pola tarde, avisos por temporal costeiro, choiva e vento, segundo recolle a Axencia Estatal de Meteoroloxía (AEMET). Desta forma, o noroeste da Coruña e a Mariña lucense pasarán na tarde deste mércores a aviso laranxa por temporal costeiro, ao agardarse ventos do oeste ou suroeste que poden alcanzar de 62 a 74 quilómetros por hora (forza oito) e mar combinado do oeste.
Ademais, durante esa xornada varios puntos das provincias da Coruña, Ourense e Pontevedra estarán en aviso amarelo por choivas que poden alcanzar nunha hora os 15 mm. Pola súa banda, Meteogalicia indicou que a chegada dunha nova fronte activa polo norte intensificará durante a xornada do mércores a circulación do suroeste, un vento que achegará moita humidade. Nas últimas horas do día as choivas serán xeneralizadas e localmente fortes en todo o territorio nas últimas horas do día e as temperaturas non sufrirán cambios.
