Presidiarios da CIG "ocupan" NCG Banco
O sindicato nacionalista organiza unha protesta contra as axudas á banca o domingo as 12,30 horas dende a Alameda de Santiago.
Por Galicia Confidencial | Santiago | 22/10/2011 | Actualizada ás 12:36
Delegados e delegadas da CIG de Compostela, vestidos de presidiarios, ocuparon o venres a oficina principal de Novagalicia Banco, no centro de Santiago, a gritos de “Que deteñan aos ladróns”, “Non, non, non á privatización”, “Queremos unha caixa e non un banco” ou “Non faltan cartos, sobran ladróns”. A ocupación da entidade encádrase na campaña que a CIG leva meses desenvolvendo para concienciar á poboación de que "si existen alternativas ás políticas que desde os gobernos" se están a impor e para chamar a participar na mobilización convocada pola central este domingo 23 de outubro.
Ao comezo do acto, o secretario comarcal da CIG de Compostela, Anxo Noceda, afirmou que o problema non é que non haxa recursos económicos, senón a quen se destinan os que hai. Así cuestionou as axudas millonarias á banca, mentres se recortan os salarios e as condicións laborais dos traballadores e traballadoras. “Pola vía pola que se está apostando é por unha concentración da riqueza en cada vez menos mans mentres se lle quita a aqueles que menos capacidade económica temos”.
Do mesmo xeito, denunciou que si existen cartos para financiar o despedimento a través do FOGASA, que paga unha parte das indemnizacións, con cartos dos traballadores e traballadoras.
Noceda sinalou que malia iso, a patronal quere máis, e a CEOE xa está demandando que se reduza a 20 días a indemnización por despedimento aos contratos indefinidos e que o FOGASA sigan pagando unha parte, para que despedir lles saia máis barato.
