Manuel Fraga negou as orixes celtas do galego ante a Liga de nacións celtas
O historiador e escritor inglés, Peter Berresford Ellis, membro destacado da Liga Celta, da que foi presidente entre 1988 e 1990, revelou unha conversa que tivo co ex-presidente da Xunta de Galicia, Manuel Fraga, a inicios dos anos 90.
Por Galicia Confidencial | Fene | 17/11/2011 | Actualizada ás 14:10
Nun discurso escrito con motivo do quincuaxésimo aniversario da Liga Celta e publicado este xoves pola Axencia de Prensa Bretona utilizou unha conversa mantida co presidente honorario do Partido Popular en 1992 para xustificar a negativa da Liga a recoñecer Galicia como nación celta.
A pesar dos numerosos estudos nacionais e internacionais sobre o tema que avalan a existencia dunha lingua celta – seguramente gaélica – no noso país, antes da chegada dos romanos, Manuel Fraga concordou co escritor inglés en que a lingua galega non ten orixes celtas e que, polo tanto, Galicia non cumpre o criterio fundamental para formar parte da Liga de nacións celtas.
Berresford Ellis, por outra banda, dedicou grandes palabras ao ex-presidente da Xunta de Galicia, ao que alcuñou de "formidable", alén de salientar o seu rol como redactor da Constitución democrática que permitiu o autogoberno e o recoñecemento do idioma galego nunha "federación" (palabras textuais) española.
A Liga Celta é unha organización que promove a autodeterminación e a identidade e a cultura celtas en Irlanda, Escocia, Gales, Bretaña, Cornwall, e a Illa de Man. A súa influencia a escala internacional é relevante, formando parte do Consello Económico e Social das Nacións Unidas.
Coa colaboración de Englishpanish
