Piden aos colexios oficiais de Xeólogos e Químicos que se "retracten" por "desprestixiar" un experto norteamericano

A Rede contra a Minaría Destrutiva na Galiza, ContraMINAcción, dirixiuse a catro institucións públicas para presentar a súa protesta formal polas manifestacións realizadas desde o Colexio Oficial de Xeólogos e do Colexios Oficial de Químicos de Galicia. O motivo da protesta son unhas manifestacións contra o científico norteamericano Steven Emerman, experto en minaría. ContraMINAcción indica nun comunicado que as manifestacións dos colexios de Xeólogos e Químicos contra Emerman, foron apoiadas polos Colexios de Enxeñeiros de Minas do Noroeste e o Colexio de Enxeñeiros Técnicos e Grados de Minas e Enerxía de Galicia. Ás catro institucións piden que se “retracten”.

O experto en minaría Steven Emerman criticara a finais de xuño pasado a falta de seguridade dentro do proxecto mineiro de O Pino-Touro. Respondendo ás conclusións de Emerman, os catro organismos oficiais mencionados, “emitiron un comunicado conxunto procurando desprestixiar abertamente ao Dr. Steven Emerman” din desde ContraMINAcción. Nun comunicado enviado pola rede contra a minaría destrutiva, aseguran que no documento emitido polos catro organismos científicos cualifican as conclusións de Emerman como “sesgadas e propias dun postulado ideolóxico”.

Segundo ContraMINAcción, os colexios oficiais mencionados, tamén criticaron as opinións do experto estadounidense sobre o informe que realizara o profesor Felipe Macías Vázquez, xa xubilado, sobre a mina de San Finx para a empresa Grupo Sacyr. O colectivo ecoloxista recolle unhas liñas do texto enviado polos colexios oficiais onde mostran o seu rexeitamento “a poñer en dúbida o traballo e profesionalidade dun catedrático”.

Neste sentido, a rede de colectivos ecoloxistas, “constando que o pronunciamento dos colexios oficiais se fixo sen ter coñecemento dos documentos oficiais” en referencia ao documento do profesor Macías Vázquez, a rede “remitiu ao colexio de xeólogos e ao colexio de químicos o polémico Informe sobre alegaciones relativas a la autorización de vertido del  proyecto minero Tungsten San Finx S.L.”.

ContraMINAcción enviou ademais dous informes de valoración aos colexios oficiais sobre o elaborado polo profesor Macías, un feito a petición do Concello de Muros e outro da asociación Verdegaia. Os dous informes falaban de “extensos plaxios, absoluta falta de rigor metodolóxico e procedimental e manipulacións groseiras” do documento sobre a explotación de San Finx, propiedade de Sacyr. Segundo a rede ecoloxista, o informe para Sacyr buscaba “eximir á concesionaria mineira do cumprimento dos límites legais”.

Desta maneira, ContraMINAcción e os colectivos que forman parte da mesma, esixen aos colexios oficiais aos que dirixiron tanto a documentación como o seu escrito, que se “retracten publicamente” en vista do que consideran expresións de desprestixio contra Steven Emerman.