O Festival FLOP consolídase en Pontevedra como apoio á "inclusión e pluralidade" de públicos e opcións sexuais

A concelleira de Festas advirte da "irresponsabilidade política" de trasladar a Pontevedra o ocorrido con Ciudadanos no Orgullo de Madrid.

Por Europa Press / Redacción | PONTEVEDRA | 10/07/2019 | Actualizada ás 19:13

Comparte esta noticia

O Festival Free Life Orgullo Pontevedra (FLOP) celebrará a súa quinta edición o próxmo 13 de xullo, de 12:00 da mañá a 12:00 da noite, no parque do río de Os Gafos, con entrada libre. Trátase dunha cita musical que pretende "reivindicar a inclusión e a pluralidade" de público de todas as idades, familias e opcións sexuais, afectivas e de parella.

Na presentación de FLOP, o DJ Viktor Flores lembrou que esta convocatoria se celebra no marco da Semana do Orgullo LGBTI e coincidindo co 50º aniversario dos disturbios en Stonewall Inn de Nova York, que simbolizan o movemento en defensa dos dereitos de homosexuais, transexuais e lesbianas.

Outro dos organizadores do Festival FLOP, José González 'alaguita', destacou que o cartel desta edición é "moi variado", con Samantha Hudson como principal convidada e "icona LGTBI", que ofrecerá unha actuación "irreverente", engadiu Viktor Flores.

A participación musical completarase cos DJ Bell Towers desde Australia e San desde Colombia, xunto cos galegos More Amore, Babykatze, Lua Zalamera, Nico, Certain People e o propio Viktor Flores, ademais do proxecto musical Blue Lixeiros in the Basement. Flores explicou que o apoio ao "tecido artístico" tanto local como autonómico, xunto coa presenza de "moitas mulleres" foron algúns dos criterios da programación.

POLÉMICA DO ORGULLO DE MADRID

Sobre a repercusión dos feitos protagonizados por representantes de Ciudadanos na manifestación do Orgullo LGTBI en Madrid, a concelleira de Festas, Carme da Silva, afirmou ter a "seguridade de que ninguén será tan irresponsable como para que alguén, por interese partidario, tente romper a filosofía do FLOP".

Para a edil nacionalista, sería unha "irresponsabilidade política" que a sociedade pontevedresa "non merece", argumentando que se trata de "polémicas que aquí non existen". No entanto, o único concelleiro e portavoz de Ciudadanos en Pontevedra, Goyo Revenga, anunciou a presentación dunha moción no pleno do próximo luns para pedir que a corporación municipal condene os "actos de odio e violencia por motivos ideolóxicos" do pasado domingo.

"SON, NATUREZA E LIBERDADE"

"Son, natureza e liberdade", apelou Carme da Silva, en alusión á lema e ao "espírito" do Festival FLOP, ao que se referiu como "unha cita obrigada no verán de Pontevedra" que o Concello ten o "orgullo" de acoller para que a cidade "siga sendo unha sociedade diversa, plural, integradora e que defende as liberdades individuais e colectivas".

A oferta de FLOP completarase con food trucks de distintas opcións culinarias e unha sesión vermut na que primará o consumo de produtos de orixe galega. Ademais, os organizadores resaltaron a aposta pola "sustentabilidad" do festival, que busca "reducir o uso de plástico" e que o público colabore na devolución dos vasos co obxectivo de producir "o mínimo impacto no parque e deixalo como estaba".

Bandeira LGTBI
Bandeira LGTBI

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta