Por Europa Press / Redacción | SANTIAGO DE COMPOSTELA | 30/05/2023 | Actualizada ás 12:59
O responsable da área LGTBI de UGT a nivel confederal, Toño Abad, pediu ao presidente do PP, Alberto Núñez Feijóo, que non utilice os dereitos das persoas LGTBI como "reféns das súas negociacións e dos seus pactos" con VOX, tras os resultados das eleccións celebradas o pasado domingo 28 de maio.
"O que lle pedimos ao PP nacional no resto de comunidades onde vai chegar a acordos coa extrema dereita é que non utilice os dereitos das persoas LGTBI como condicionante das negociacións", sinalou. Nunha rolda de prensa en Santiago de Compostela para presentar a constitución da área LGTBI de UGT-Galicia, Abad lembrou que os dereitos LGTBI "son dereitos humanos", polo que "non poden formar parte dunha negociación" nin de "un intercambio de cromos para conseguir cadeiras".
Nesta liña, o responsable de UGT afirmou que o PP pasou "por distintas fases políticas". Así, relatou que en 2014, "cando o seu espazo político se vía ocupado por outras opcións máis liberais", os populares "reaccionaban facendo concesións cara a estas materias".
ÁREA LGTBI
UGT-Galicia constituíu este martes a súa área LGTBI co obxectivo de loitar polos dereitos deste colectivo tanto no ámbito social como laboral. A coordinadora será Laura García. Así, o sindicato cumpre co mandato do 43 Congreso de UGT no que se instaba aos seus organismos a constituír estas áreas para tratar de loitar polos dereitos do colectivo LGTBI, sobre todo no ámbito laboral.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.