O custo laboral sobe un 5,2 % en Galicia en 2024 mentres que en España o incremento é dun 3,9 %

En 2024, o custo total bruto por persoa traballadora en Galicia foi de 33.878 euros, un 5,2 % máis que no ano anterior, segundo os datos que publica o Instituto Galego de Estatística (IGE) este xoves. En España, o incremento foi dun 3,9 %. En canto ao custo laboral neto, foi de 33.642 euros por persoa traballadora na comunidade galega, unha vez deducidos 236 euros en conceptos de subvencións e deducións das administracións públicas para fomentar o emprego e a formación profesional.

O pasado ano, o custo laboral medio por persoa traballadora en Galicia representou o 90,3 % da media nacional, 1,2 puntos máis que en 2023. O 72,8 % do custo total galego destinouse a salarios --24.666 euros por persoa-- e o 24,7 % a cotizacións obrigatorias á Seguridade Social --8.375 euros a nivel individual--. Do resto de partidas que compoñen o custo, 418 euros anuais por traballador destináronse a beneficios sociais, 148 corresponderon a indemnizacións por despedimento, 131 euros a formación profesional e 140 a gastos derivados do traballo. 

O custo laboral medio por traballador en Galicia representou no 2024 o 90,3 % da media nacional e nos tres sectores considerados, é inferior ao nacional. Así, as diferenzas con España reducíronse no industrial e servizos. Na construción, a rexión, que en 2023 tiña dato igual ao do conxunto nacional, sitúase no 97,9 % da media.