Homenaxe da RAG a Pardo de Andrade, un dos primeiros xornalistas galegos
En 1813 publica un 'Rogos dun gallego', en galego, para convencer aos seus paisanos dos valores constitucionais. Sufriu exilio e viviu en Francia, Inglaterra e Bélxica.
Por Galicia Confidencial | A Coruña | 04/11/2013 | Actualizada ás 10:00
Manuel Pardo de Andrade, tamén coñecido como "León de Parma, Pardo de Chas ou Vardo de Chaz" --como asinaba os seus escritos-- foi un fidalgo nado en San Martiño de Dorneda, na Coruña en 1760, que exerceu de escritor, poeta e político liberal.
Tamén foi un dos primeiros xornalistas galegos, sufriu exilio e escribiu un dos primeiros textos en galego. Precisamente por iso, por cumprirse 200 anos do seu romance de cego 'Os rogos d'un gallego', que escribiu exiliado en Londres, a RAG adícalle este martes unhas xornadas que inauguran o seu pesidente, Xesús Alonso Montero; o Secretario Xeral de Cultura, Anxo Lorenzo, e Angel García Seoane, Alcalde do Concello de Oleiros.
"Abrille os ollos sobre certas iñorancias"
'Os rogos d'un gallego' é un libro que Pardo de Andrade adicou aos seus paisanos para "abrilles os ollos sobre certas iñorancias, e o demais que verá o curioso lector" e divulgar os principios constitucionais. Sobre o significado deste escrito falarán nestas xornadas o ex presidente da RAG e catedrático de Historia Contemporánea, Xosé Ramón Barreiro, que abordará a "Manuel Pardo de Andrade e a Galicia do seu tempo”, M.ª Rosa Saurin de la Iglesia cunha “Semblanza de Manuel Pardo de Andrade” e Gonzalo Navaza sbore "o exilio en Francia de Manuel Pardo de Andrade”.
O fidalgo, ex agostiño e revolucionario, viviu a cabalo de Galicia, Inglaterra, Francia e Bélxica. Durante a Guerra da Independencia, e co grado de capitán, aproveita para porse á fronte do Diario da Coruña, primeiro xornal político, (1808-1809), auspiciado pola Xunta de Galicia.
Dirixe logo o Semanario Político, Histórico e Literario da Coruña (1809-1810) e en 1811 encárgase tamén de redactar o Boletín Patriótico, de breve vida, e colabora no Cidadán pola Constitución (1812-1814).
