Paula Prado: "a alta velocidade, efectivamente, chegou a Ourense, pero ten que chegar a toda Galicia canto antes"
O PPdeG presentará mocións en todos os municipios polo atraso de trens Avril e censura as "escusas" do Goberno.
Por Europa Press / Redacción | SANTIAGO DE COMPOSTELA | 08/07/2022 | Actualizada ás 13:47
A secretaria xeral do PPdeG, Paula Prado, informou de que os populares presentarán mocións en todos os concellos galegos para esixir que se poñan en marcha os trens Avril, despois de que se confirmou o atraso na súa chegada a Galicia.
En rolda de prensa, Prado recrimina ao Goberno que "non busquen escusas onde non as hai" sobre o atraso dos trens Avril --que suporía levar a alta velocidade ao Eixo Atlántico-- e reclama que "asuma a súa responsabilidade". "Sánchez perdeu o tren da confianza de todos os galegos e galegas", sentenza.
Remarca que "a alta velocidade, efectivamente, chegou a Ourense, pero ten que chegar a toda Galicia canto antes", ademais da modernización da liña a Lugo e Ferrol. Lembra que había un compromiso de que os trens Avril chegase no verán á comunidade galega, pero "o único que chegou foi un comunicado de Renfe" no que recoñece que non será posible.
"Agora descubrimos o que xa sabiamos, que non se trataba dunha cuestión prioritaria para o Goberno central". "Agora chega o momento de buscar escusas rápidas, discusións entre Renfe e Talgo, que, por suposto, non nos convencen", reproba.
A secretaria xeral do PPdeG quéixase de que se trata de "unha nova falta de respecto institucional a Galicia", mentres deixa claro que os galegos "se merecen unha explicación".
REUNIÓN DE RUEDA CON SÁNCHEZ
Por outra banda, Prado reprobou como unha "falta de respecto institucional" que o presidente da Xunta, Alfonso Rueda, decatouse por "unha entrevista radiofónica" de que será recibido este mes polo titular do Goberno central, Pedro Sánchez, no canto de ser "a través de resposta oficial".
