Unha oficina de Abanca de Mazaricos, "Mellor oficina do rural" do ano 2022
O premio recoñece a excelencia da oficina na atención e servizo ao cliente, así como o cumprimento dos seus obxectivos de negocio.
Por E.P. | Santiago de Compostela | 13/04/2023 | Actualizada ás 18:45
O presidente de Abanca, Juan Carlos Escotet, e o conselleiro delegado, Francisco Botas, entregaron este xoves á oficina da Picota, situada no municipio coruñés de Mazaricos, a distinción como mellor oficina rural do banco do pasado ano 2022.
Tal e como explica Abanca, a oficina da Picota, formada por catro profesionais, "exemplifica o concepto diferencial de centro de atención e servizo de Abanca no medio rural". "Ademais dos elementos habituais na identidade do banco, as súas características principais son a súa estreita conexión coa súa contorna social e a súa especialización nas particularidades do sector agrogandeiro, reforzada co apoio da unidade Abanca Agro", apuntan.
Outros exemplos da súa "estreita conexión coa contorna social e económica do concello", son o patrocinio e participación en xornadas técnicas da Semana Gandeira de Mazaricos, que organiza o concello desde 2016, así como o convenio de colaboración coa Asociación Gandeira de Mazaricos, que contempla todo tipo solucións financeiras para os profesionais do sector agrogandeiro en condicións preferentes.
O presidente e o conselleiro delegado de Abanca aproveitaron a visita á Picota para manter un encontro cos profesionais da oficina e para visitar a explotación gandeira SAT Busto-Corzón, unha das explotacións de vacún de leite con maior produción de Galicia.
