A poboación de Galicia nin sobe nin baixa no primeiro trimestre do ano
Está lonxe das situacións de autonomías como Madrid, Cataluña ou Valencia que seguen crecendo.
Por Europa Press / Redacción | SANTIAGO DE COMPOSTELA | 23/05/2023 | Actualizada ás 11:14
A poboación de Galicia mantívose sen variación no primeiro trimestre do ano, fronte ao incremento do 0,28% da media, segundo a Estatística Continua de Poboación (ECP) que publica este martes o Instituto Nacional de Estatística (INE) por primeira vez para proporcionar cada trimestre unha estimación provisional sobre a evolución da poboación.
Segundo este informe, durante o primeiro trimestre de 2023 estímase que a poboación creceu en quince comunidades autónomas, e reduciuse nunha e nas cidades autónomas de Ceuta e Melilla.
Os maiores incrementos en termos relativos déronse na Comunidade de Madrid (0,60 por cento), Comunidade Valenciana (0,54 por cento) e Cataluña (0,46 por cento), mentres que a poboación descendeu en Estremadura (-0,07 por cento) e Galicia anotouse un -0,00 por cento.
Doutra banda, en España, as principais nacionalidades dos inmigrantes durante o primeiro trimestre de 2023 foron a colombiana (con 44.300 chegadas a España), a marroquí (23.200) e a venezolana (21.500). Pola súa banda, as nacionalidades de emigrantes máis numerosas foron a española (con 11.500 saídas), a marroquí (8.400) e a romanesa (7.700).
