Rueda aposta por "modernizar o rural" para garantir un sector lácteo clave no "futuro de Galicia"
Por Europa Press / Redacción | LUGO | 07/11/2023 | Actualizada ás 16:58
O presidente da Xunta de Galicia, Alfonso Rueda, trasladou este martes na súa visita ás instalacións do Grupo Lence, en Lugo, o compromiso do Goberno autonómico co sector lácteo galego, produtor de "case a metade do leite que se consome en España" e industria estratéxica para a comunidade "nun ámbito cada vez máis competitivo".
"É fundamental que empresas como as que conforman este grupo sigan funcionando. Hai que modernizar o noso rural, hai que facer fronte a todos os retos, todos os desafíos e todos os perigos que hai agora mesmo", proclamou Rueda, de maneira introductoria, tras percorrer a planta de produción da compañía, a segunda empresa que máis leite recolle en toda Galicia e a única da comunidade instalada entre os catro grupos líderes do sector en España.
O líder da Xunta, que estivo acompañado na súa visita polo director xeral de Gandaría, Agricultura e Industrias Agroalimentarias da Consellería de Medio Rural, José Balseiros; a vicepresidenta do Parlamento de Galicia, Elena Candia; e o delegado da Xunta de Galicia en Lugo, Javier Arias; destacou o feito de que Galicia "é unha potencia láctea" nun sector, dixo, "que deixa atrás a todos os que non son capaces de entender as innovacións" que expón a industria.
Nese sentido, Rueda resaltou o traballo que realiza o Grupo Lence, responsable da creación, segundo a directora xeral da empresa, Carmen Lence, de "223 empregos directos e 800 indirectos", para transformar o produto nas súas propias instalacións. "Se o noso campo segue tendo oportunidades de traballo e segue tendo capacidade para responder a unha demanda cada vez máis esixente, iso quererá dicir que Galicia ten futuro", finalizou o presidente da Xunta, que destina cada ano, segundo os datos do Executivo autonómico, 100 millóns de euros a un sector considerado como un dos principais motores da economía no rural galego.
