Preocupación pola mortaldade do marisco que se estende polas rías e pon a campaña de Nadal en risco
As mariscadoras alertan dun "desastre" xeneralizado, ao que se unen furtivos en zonas como Vilaboa e Redondela.
Por Europa Press / Redacción | SANTIAGO DE COMPOSTELA | 16/11/2023 | Actualizada ás 13:56
A mortaldade do marisco esténdese polas rías galegas tras un mes de treboadas e aperturas de presas que provocan un aumento de auga doce. Así, a de Pontevedra pechará ao marisqueo ata o 27 de novembro para esperar a que se recupere o produto e co obxectivo de poder salvar a campaña de Nadal. Con todo, no fondo da ría de Vigo --Arcade, Redondela e Vilaboa-- son máis pesimistas e temen perder a campaña estrela do ano. Todo iso unido á morte masiva de bivalvos nas rías de Arousa e Muros-Noia dos últimos días.
En declaracións a Europa Press, a patroa maior de Lourizán, Mari Carmen Vázquez, explica que, ademais da mortaldade, produciuse unha caída de prezo "bestial", de máis do 50%. Por iso, tomouse a decisión de parada ata o 27 de novembro a "ver se colle algo de forza" a ameixa e "pódese aproveitar algo na campaña de Nadal".
"A verdade é que é un desastre o que temos nos bancos marisqueiros; hai preocupación dos mariscadores porque hai familias enteiras que viven diso", lamenta Vázquez, no que identifica con "unha agonía". Expón que as choivas coincidiron con mareas baixas e "pleamares tremendas", con niveis de auga doce moi alta e mar de fondo que foi desenterrando á ameixa. Aquí hai máis de 460 mariscadores no plan de marisqueo a pé.
Apunta que haberá que analizar todo o banco marisqueiro para conseguir axudas por baixada de produtividade, nun proceso que "leva un tempo". "Temos que buscar unha solución. Se nos morre todo e temos unha mortalidade do 80% ou 90% na ría, que vai pasar o resto do ano?", cuestiona, á vez que pide que a Administración galega estea "de xeito conxunto" con eles. Máis aló dos mariscadores, respecto da posibilidade de recorrer a un ERTE para os traballadores da propia confraría tal e como ocorreu na de Noia, a patroa maior descarta esta posibilidade "por agora" ao haber "traballo de oficina" aínda que non haxa poxas en lonxa. No entanto, "haberá que ver que pasa despois do 27", pois a frota tamén ten previsto empezar a finais de mes.
PREVISIÓN DE PERDER A CAMPAÑA DE NADAL EN ARCADE
A presidenta das mariscadoras de Arcade, Rita Míguez, explica a Europa Press que o pasado luns constataron que "había moitísima mercadoría morta". "Nunca viramos a comida do berberecho e da ameixa flotando pola auga", lamenta. Así, decidiuse "non tocar" para "a ver se a ameixa que está medio tocada recupera" cuns días de calor, pero "probabas a auga e podíala beber tranquilamente" do doce que está. O martes tamén se observou en O Cunchido, que comparten con mariscadoras de Vilaboa, "ameixa toda morta".
Prevé que a parada se prolongue máis aló deste mes: "Igual para nós a campaña de Nadal xa está perdida". "A ameixa está tocada, non morre de golpe, debilítase coa auga doce e a que non morre rápido farao máis tarde", explica. Son preto de 80 mariscadoras afectadas en Arcade, que está xusto na desembocadura do río Verdugo e é a que "máis sofre o impacto de auga doce". Pon sobre a mesa tamén a posibilidade de que científicos e universidade investiguen sobre a posibilidade de que haxa unha ameixa máis resistente á auga doce. "O futuro témolo complicado", sentenza Rita Míguez.
FURTIVOS EN REDONDELA E VILABOA
A presidenta das mariscadoras de Redondela, Ana Belén Sotelino, apunta que aquí "é o mesmo" que no resto do fondo da ría de Vigo. Fixéronse mostraxes esta semana e "é incrible, hai mortaldade de todo". "Ata temos unha zona que está chea de longueirón todo podrecido", relata. Pero, "aínda por encima", únese a problemática de que "hai furtivos". "Levamos toda a semana facendo vixilancias e vímolos, estamos a atopar sacos. Como se pode vender ameixa que está aberta, podrecida e que cheira mal?", pregúntase.
Demanda axudas da Xunta e "esperar a ver como vai a situación". Todo este mes houbo vento do sur que "mete as augas quentes e impide que o recurso se alimente, entérrese e que estea ben, estresándolo". Espérase que a semana que vén entre vento do norte que "trae afloramiento á enseada de San Simón ao traer auga fría".
A campaña de Nadal "está bastante complicada", resume para o tres confrarías do fondo da ría, "pero é algo xeneralizado porque as compañeiras de Pontevedra e Arousa están igual". A presidenta das mariscadoras tamén pide que se vixíe "como se abren as presas", "que se abren con pleamar".
Este xoves están a realizarse mostraxes para saber o alcance. Cuestionada sobre se prevén poder traballar para a campaña de Nadal, responde: "Non sabemos, non podo dicir nin si nin non". "Sería mellor traballar, pero se o tocamos é peor", expresa. En Vilaboa son preto de 60 mariscadoras. "Non queremos pedir axuda nin nada, pero se non hai máis remedio", conclúe Cortegoso.
