Así será o equipo de Rueda: elimina as vicepresidencias e entran catro novos conselleiros tras a saída de Comesaña e Rivo

O presidente da Xunta, Alfonso Rueda, decidiu pasar páxina e deseñou un novo Goberno autonómico que toma distancias co acuñado polo seu antesor, Alberto Núñez Feijóo, a partir do seu segundo mandato, xa que elimina as dúas vicepresidencias, aínda que mantén no seu Executivo a quenes as dirixían ata agora: o líder do PP provincial da Coruña, Diego Calvo, e Ángeles Vázquez.

Este é o primeiro equipo que se considera de Rueda en sentido estrito, dado que herdou o de Feijóo cando lle sucedeu en maio de 2022 e converteuse en sexto presidente da autonomía. Apenas un ano despois empezou a axustalo á súa medida, pero de novo propiciado por unha decisión do seu antecesor, agora líder do PP estatal, quen forzou cambios ao levar a Madrid a Francisco Conde e Rosa Quintana.

O novo Goberno de Rueda é coherente con algunhas das ideas que foi avanzando nos últimos días, sobre todo no seu discurso de investidura desta semana no Parlamento de Galicia. Así, a reforma da estrutura é de calado, non só pola supresión das vicepresidencias, senón porque crea unha nova consellería (a de Cultura, Lingua e Xuventude) e recoloca numerosas competencias.

O departamento de Cultura, Lingua e Xuventude dirixirao o principal protagonista das 'quinielas' das últimas semanas e un dos catro novos que sentarán, despois de tomar posesión este luns, no novo Consello da Xunta: o alcalde da Estrada, José López Campos.

López Campos será un dos sete homes que acompañarán a Rueda nun Executivo no hai cinco mulleres (fronte a proporción de xénero seis-cinco que había ata agora). E do que saen Julio García Comesaña (que dirixía Sanidade) e Elena Rivo (ata agora á fronte de Emprego). Ethel Vázquez xa abandonou a Xunta semanas atrás para situarse na Secretaría da Mesa do Parlamento.

DOUS CONSELLEIROS QUE VEN REBAIXADO O SEU RANGO POLÍTICO

Fronte a un modelo que elevaba o rango político de dous dos seus membros, Rueda apostou por un modelo no que el reforza o seu peso presidencial e dá aos conselleiros condicións de igualdade. Así, Diego Calvo e Ángeles Vázquez despídense dos seus cargos de vicepresidentes primeiro e segundo, respectivamente.

Máis aló de ver rebaixado o seu rango político formal, Calvo mantén sen cambios as súas competencias e dirixirá a Consellería de Presidencia, Xustiza e Deportes; mentres que Ángeles Vázquez porase á fronte de Medio Ambiente e Cambio Climático (unha área que Rueda decidiu elevar ata formar parte da denominación dunha consellería).

Deixará de xestionar as competencias de vivenda, que o presidente tamén quere realzar e que levou a outro departamento: a consellería de Vivenda e Planificación de Infraestruturas, que pasa a mans de María Martínez Allegue. Deputada por Pontevedra, foi directora xeral da Axencia de Protección da Legalidade Urbanística (APLU) entre os anos 2010 e 2015.

OUTRAS DÚAS CARAS NOVAS EN SANIDADE E MEDIO RURAL

Outra das caras novas que estará na foto de familia do novo Goberno deste luns é a da conselleira que se pon á fronte do departamento do Medio Rural, María José Gómez Rodríguez, profesora de inglés, alcaldesa de Guntín e senadora pola súa provincia. Releva neste departamento a José González, que cambia de competencias.

E aínda que ninguén no PP actual fala en público de 'cotas' políticas, o certo é que se se pode dicir que Lugo gaña unha conselleira (que se suma a Alfonso Villares, que continúa como titular da Consellería do Mar), Ourense pérdea (coa saída de Elena Rivo, que dirixía Emprego e Igualdade, e o conselleiro ourensán que permanece é José González).

González será o titular dunha nova Consellería de Emprego, Comercio e Emigración. Así, herda as competencias de Rivo en materia de Emprego (que Rueda decide separar das de igualdade), e súmalles comercio e emigración, despois de que o presidente xa avanzase a súa intención de ligar emprego e emigración (unha Secretaría que ata agora dependía directamente da Presidencia).

Novo será tamén Antonio Gómez Caamaño, que substitúe a Comesaña en Sanidade. Licenciado en Medicina, é especialista en Oncoloxía Radioterápica e, desde 2013, xefe do servizo desta área no Complexo Hospitalario Universitario de Santiago de Compostela (CHUS).

AXUSTES NAS ÁREAS DE GARCÍA E RODRÍGUEZ, E CORGOS SEGUE CON FACENDA

Xunto coas consellerías de Medio Rural e Mar (dúas áreas estratéxicas na economía galega), así como Sanidade, e nun escenario no que practicamente todos os departamentos sofren cambios, Rueda decidiu manter unha Consellería de Facenda e Administración Pública, á fronte da que tamén seguirá Miguel Corgos.

Continuarán tamén no Executivo Fabiola García, Román Rodríguez e María Jesús Lorenzana, aínda que con axustes nas súas competencias. A primeira despréndese de Xuventude (que agora estará baixo a á de López Campos) e gaña Igualdade (que Rueda decidiu separar de Emprego), mentres que o segundo cede Cultura ao tamén ata agora alcalde da Estrada e dirixirá a Consellería de Educación, Ciencia, Universidades e Formación Profesional.

Rueda tamén avanzara que Ciencia gañaría peso (e sóbea ao nome da Consellería) e a súa intención de ligar a innovación e a investigación científica, e levalas a Educación. Deste xeito, Lorenzana ve rebautizada a ata agora Consellería de Economía, Industria e Innovación como Consellería de Economía e Industria.

 

 

 

 

Ver esta publicación en Instagram

 

 

 

 

 

 

 

 

 

 

 

Una publicación compartida de Galicia Confidencial (@galicia_confidencial)

RUEDA PIDE AO NOVO EQUIPO "RESPONSABILIDADE, ESFORZO E COMPROMISO"

O presidente da Xunta, Alfonso Rueda, difundiu no seu perfil da rede social 'X' a fotografía dos integrantes do seu novo Goberno cunha mensaxe: "Responsabilidade, esforzo e compromiso con todos os galegos e galegas". "Con todos sen excepción. Iso é o que pido ao novo Goberno da Xunta. Un equipo co que seguiremos traballando aínda con máis intensidade ao estilo Galicia", proclamou.

Nun fío, trasladou tamén o seu agradecemento aos conselleiros que saíron do Consello da Xunta: Ethel Vázquez, Elena Rivo e Julio García Comesaña. Aos tres agradécelles a súa "dedicación" con Galicia nos últimos anos. "Axudar a construír unha mellor Galicia, sempre foi a súa prioridade e estou seguro de que así seguirá sendo no futuro", concluíu.

TOMA DE POSESIÓN ESTE LUNS

O presidente da Xunta, Alfonso Rueda, asinou este mesmo domingo o decreto de nomeamento dos integrantes do novo Executivo que sentarán con el no Consello de Xunta. Fontes consultadas por Europa Press confirmaron que este luns tomarán posesión dos seus cargos as novas conselleiras e conselleiros. Será a ocasión non só para que manteñan o seu primeiro encontro, senón para que se produza a primeira foto de familia.

LUÍS LÓPEZ, ELENA CANDIA E LUÍS MENOR AVALAN O NOVO GOBERNO

Luís López, Elena Candia e Luís Menor, presidentes provinciais do PP en Pontevedra, Lugo e Ourense, respectivamente, avalaron o novo goberno nomeado por Alfonso Rueda este domingo. Así, o líder dos populares pontevedreses celebrou nunha mensaxe na rede social 'X' que Galicia está "nas mellores mans" e, con ela, a provincia de Pontevedra.

Sobre os novos conselleiros, Luís López sinalou que José López Campos, ata agora alcalde da Estrada e que será o encargado de dirixir a Consellería de Cultura, Lingua e Xuventude, dará "o mellor" del no Goberno galego. "É un gran xestor, como ben demostraches na Deputación de Pontevedra", subliñou. Tamén felicitou a María Martínez Allegue, nova conselleira de Vivenda e Planificación de Infraestruturas, e a Román Rodríguez, que repite na organigrama de Rueda á fronte da Consellería de Educación, Ciencia, FP e Universidades. "Grandísimo equipo!", manifestou.

Pola súa banda, Elena Candia mostrou o seu orgullo porque dous lucenses como Alfonso Villares e María José Gómez formen parte do Goberno de Alfonso Rueda con "responsabilidades tan importantes como Mar e Medio Rural". "A traballar por Lugo e por Galicia", afirmou. Mentres, o presidente do PP de Ourense, que tras a saída de Elena Rivo queda só con José González como representante da provincia no Consello da Xunta, destacou que Rueda elixiu aos perfís que "mellor se adaptan aos labores que vai encargar" a cada un deles, para "devolver en forma de logros a confianza que o pobo galego deulle de maneira maioritaria nas últimas eleccións autonómicas".

Nesta liña, o ourensán asegurou que confía no goberno elixido por Rueda, que espera que realice "un intenso labor para conseguir o mellor para a provincia de Ourense". Así mesmo, defendeu que aproba o nomeamento de José González para a Consellería de Emprego, Comercio e Emigración despois de "desenvolver un magnífico traballo na Consellería do Medio Rural". Tamén agradeceu a Elena Rivo "o seu bo labor" á fronte da Consellería de Promoción do Emprego e Igualdade, que dirigó desde xuño de 2023.