A muralla romana de Lugo está de aniversario

Diversos actos conmemoran os 15 anos da súa declaración como Patrimonio da Humanidade. Na noite deste domingo, centos de farois encheron del luz o ceo da cidade. Este luns estrease o primeiro ascensor do monumento e haberá torta solidaria para veciños e visitantes.

Por Galicia Confidencial | Lugo | 30/11/2015 | Actualizada ás 12:36

Comparte esta noticia

A muralla romana de Lugo está de aniversario. Cumpre 15 anos como Patrimonio da Humanidade e, con tal fin, se teñen organizado diversas actividades para conmemorar esta data con concertos, presentacións e actividades lúdico-festivas.

O ceo de Lugo énchese de faroliños luminosos para conmemorar o 15º aniversario da declaración da muralla romana como Patrimonio universal
O ceo de Lugo énchese de faroliños luminosos para conmemorar o 15º aniversario da declaración da muralla romana como Patrimonio universal | Fonte: Concello de Lugo

Este domingo, máis de 3.000 persoas asistiron desde as propias murallas ao lanzamento de máis de medio milleiro de farois que encheron de luz a fría noite de capital lucense. E este luns, inaugurouse o primeiro ascensor  para facilitar o acceso ao adarve da Muralla romana de Lugo a persoas con problemas de mobilidade.

Neste acto estivo o conselleiro de Cultura, Román Rodríguez, acompañado pola alcaldesa de Lugo, Lara Méndez, e outras autoridades locais. Nel, fíxose entrega simbólica das chaves do ascensor a un representante do colectivo Auxilia, Aquilino González, dado que esta organización foi durante anos a cabeza visible da loita por esta infraestrutura.

Os actos de conmemoración do recoñecemento da Muralla como Ben Mundial continúan esta tarde. Os lucenses e visitantes poderán degustar a partir das 18:00 horas nunha carpa instalada na praza Anxo Fernández Gómez un anaco de torta xigante e solidaria, pois a ración soamente custará 20 céntimos, que serán destinados a unha asociación sen ánimo de lucro. Ás 20:00 horas, o Círculo das Artes acollerá un dobre concerto de jazz, onde actuarán Elisabet Raspall&Clara Luga e Carmen Souza&Theo Pascal.

Durante esta fin de semana, a Taberna Daniel, restaurante Antas, Curruncho A Nosa Terra, Arrocería Os Cachivaches, a parrillada Porta Santiago, o restaurante Campos e o Mesón do Alberto ofreceron menús con prezos especiais dedicados á Muralla.

Do 4 ao 8 de decembro, na carpa de Anxo Fernández Gómez haberá un concurso de fotografía sobre o monumento bimilenario. A partir de marzo do 2016, no Centro de Interpretación da Muralla estarán dispoñibles postais sobre a recuperación e posta en valor das portas da Muralla de onte e de hoxe.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta